“Biz Bakıdanıq” adlı estrada-simfonik orkestri yaradılıb

Azərbaycan Dövlət Musiqili Komediya Teatrının gənc aktyor-vokalisti Ramil Qasımov “Biz Bakıdanıq” adlı yeni estrada-simfonik orkestri yaradıb. Teatrın mətbuat xidmətindən verilən məlumata görə, gənc solistin rəhbərliyi altında fəaliyyət göstərən orkestrin tamaşaçılarla ilk görüşü İctimai Kanalın “Yeni Gün” səhər proqramında olub. “Yeni Gün” proqramı Türkiyənin TRT-AVAZ kanalı ilə yaratdığı telekörpü vasitəsi ilə gənc aktyoru və onun yeni kollektivini dünyanın bir çox ölkələrində yaşayan türkdilli xalqlarla da görüşdürüb. Qeyd edək ki, solist-vokalist kimi öz imkanlarından geniş istifadə edən aktyor Ramil Qasımov 1999-cu ildən Azərbaycan Dövlət Musiqili Komediya Teatrının solistidir. İşlədiyi müddət ərzində teatrda tamaşaya qoyulan “Hələlik” (E.Sabitoğlu, R.Əhmədzadə), “O olmasın, bu olsun” (Ü.Hacıbəyli), “Şeytanın yubileyi” (O.Rəcəbov, A.Babayev) kimi tamaşalarda əsas partiyaları ifa edib.

HÜSNİYYƏ

525-ci qəzet.- 2011.- 1 fevral.- S.7.