Kino xadimi Yusif Şeyxovun 60 yaşı tamam olur

Bu gün – fevralın 2-də milli kinomuzun dəyərli simalarından olan, öz professionallığı və səmimiyyəti ilə seçilən, bacarıqlı təşkilatçı və ssenarist kimi tanınan Yusif Şeyxov özünün 60 yaşını qeyd edir. Bununla bağlı Azərbaycan Professional Kinorejissorlar Gildiyası Bürosunun yaydığı açıqlamada bildirilir: “Ömrünün böyük bir hissəsini – 40 ilini, milli kinomuzun inkişafına həsr edən Y.Şeyxov 1975-ci ildə Azərbaycan Dövlət İncəsənət İnstitutunu bitirdikdən sonra fəaliyyətə rejissor assistenti qismində, “Azərbaycanfilm“ kinostudiyasında başlayıb. Sonralar Dövlət Kinematoqrafiya Komitəsi (1979-1985), “Azərkinoprokat” (1985-1990), “Azərkinovideo” İB (1990-2001), Mədəniyyət Nazirliyi (2001-2006) və Mədəniyyət və Turizm Nazirliyində (2006-cı ildən) fəaliyyətini davam etdirib. Harda işləməsindən aslı olmayaraq, Yusif Şeyxov öz bacarıq və istedadını əsirgəməyib və işə professional, ətrafdakılara isə mehriban və səmimi münasibət bəsləməsilə seçilib. O, Azərbaycan kinosunda çalışdığı bu illərdə bütün yaradıcı istedadını kinomuzun təbliğinə və inkişafına həsr edib, kino onun üçün həyati amilə çevrilib. Kino yaradıcılığına hələ məktəb illərində “Sehrli xalat” filmində baş qəhrəmanlardan birini oynamaqla başlayan Yusif Şeyxov sonralar bir çox bədii, sənədli və cizgi filmlərinin ssenari müəllifi olub, maraqlı, aktual mövzulara toxunub. Kino sahəsindəki uzunmüddətli, səmərəli xidmətinə görə Azərbaycanın Əməkdar Mədəniyyət İşçisi fəxri adına layiq görülmüş Yusif Şeyxov Professional Kinorejissorlar Gildiyasının üzvü olaraq milli kinematoqrafın ictimai həyatında fəal iştirak edən, öz həmkarları və dostları arasında nüfuza və hörmətə malik sənətçidir. Hörmətli və əziz həmkarımızı 60 illik yubileyi münasibətilə ürəkdən təbrik edir, ona həyatda və sənətdə yeni-yeni uğurlar arzulayırıq”.

GÜNEL

525-ci qəzet.- 2011.- 2 fevral.- S.7.