Pianoçu Ülviyyə Hacıbəyova ilə görüş olub

Maestro Niyazinin mənzil-muzeyində dəyərli pianoçu, Bakı əməkdar incəsənət xadimi Ülviyyə Hacıbəyova ilə yaradıcılıq görüşü gerçəkləşib. Azərbaycan Musiqi Mədəniyyəti Dövlət Muzeyi nəzdində Klassik Musiqisevərlər Klubunun təşkilatçılığı ilə həyata keçirilən tədbirdə BMA-nın müəllim və tələbələri, Ü.Hacıbəyovanın sənət dostları, yaxınları iştirak ediblər.

Çıxış edənlər Ülviyyə Hacıbəyovanın şəxsiyyəti və yaradıcılığı haqqında ətraflı danışıblar. Sənət bioqrafiyası barədə bildirilib ki, Ülviyyə Hacıbəyova 1977-ci ildə Bülbül adına Bakı Orta İxtisas Musiqi Məktəbini, 1983-cü ildə Azərbaycan Dövlət Konservatoriyasını (indiki Üzeyir Hacıbəyli adına Bakı Musiqi Akademiyası), 1986-cı ildə isə assistentura-stajorluğu əla qiymətlərlə başa vurub. 1967-ci ildən radioda, televiziyada və konsert salonlarında çıxış edən pianoçu Zaqafqaziya və Ümumittifaq müsabiqələr diplomçusudur.

Tədbirdə Ü.Hacıbəyovanın həyat və yaradıcılığını əks etdirən slayd nümayiş olunub.

Ü.Hacıbəyova yaradıcılığı ilə bağlı iştirakçıları maraqlandıran sualları cavablandırıb. Daha sonra o, özünün “Xalq dastanları Azərbaycan bəstəkarlarının opera yaradıcılığında” kitabını muzeyin direktoru Rza Bayramova bağışlayıb. Görüş iştirakçılarına Ü.Hacıbəyovanın və tələbələrinin ifasında F.Şopenin, P.İ.Çaykovskinin, Q.Qarayevin, S.Hacıbəyovun əsərlərindən ibarət konsert proqramı təqdim olunub.

HÜSNİYYƏ

525-ci qəzet.- 2011.- 5 fevral.- S.17.