Boris Pasternakın şeirlər toplusu Azərbaycan dilində

ŞAİRİN DÜNƏN TƏQDİMATI KEÇİRİLƏN “MİSRANIN SAHİBİ HİSSLƏR OLANDA” KİTABI “525 KİTAB” SERİYASI ÜZRƏ NƏŞR EDİLİB

Dünən Azərbaycan Yazıçılar Birliyində böyük şair Boris Pasternakın dilimizə tərcümə edilmiş şeirlərindən ibarət “Misranın sahibi hisslər olanda” kitabının təqdimatı keçirilib. Xatırladaq ki, bu, Azərbaycan Respublikası Mədəniyyət və və Turizm Nazirliyinin dəstəyi əsasında “525 kitab” seriyasından nəşr olunan 12-ci kitabdır. Kitabdakı şeirlərin tərcüməsi xalq yazıçısı Anarın və şair Səlim Babullaoğlunundur. Bundan öncə seriya üzrə xarici ədəbiyyatdan Söhrab Sipehri və Mişel Uelbekin, Azərbaycan ədəbiyyatından isə Çingiz Abdullayev, Səlim Babullaoğlu, Natiq Rəsulzadə, Elçin Hüseynbəyli, Fikrət Sadıq, İlqar Fəhmi, Səməd Səfərov, Qismət və Aysel Əlizadənin kitabları işıq üzü görüb. Azərbaycan Yazıçılar Birliyinin “Natəvan” klubunda keçirilən tədbiri sözügedən seriyanın rəhbəri, Birliyin katibi, “525-ci qəzet”in baş redaktoru Rəşad Məcid açaraq, layihə barədə məlumat verib, layihənin gerçəkləşməsinə dəstək verdiyinə görə Mədəniyyət və Turizm Nazirliyinin rəhbərliyinə minnətdarlığını bildirib. Sonra söz seriyanın tərtibçisi və redaktoru Səlim Babulloğluna verilib. O, seriya haqqında məlumat verərək, Boris Pasternakın tərcümələri üzərində iş haqqında danışıb. Azərbaycan Yazıçılar Birliyinin katibi, xalq yazıçısı Çingiz Abdullayev də layihə, seriya və yeni nəşr barədə fikirlərini bölüşüb. Tədbirdə iştirak edən Rusiyanın Azərbaycandakı səfiri Vladimir Doroxin Boris Pasternakın kitabının nəşrinə görə minnətdarlığını bildirib. Səfir qeyd edib ki, Boris Pasternak onun sevimli şairidir və bu şairin şeirlərini tərcümə etmək çox çətin, məsuliyyətli işdir. Millət vəkili Fazil Mustafa, “Azərbaycan” jurnalının baş redaktoru İntiqam Qasımzadə, xalq şairi Söhrab Tahir, şair-tərcüməçi Mahir Qarayev, şair Elxan Zal Qaraxanlı da çıxış edərək, layihə və kitab barədə fikirlərini söyləyiblər. Sonda Boris Pasternakın öz səsində şeiri dinlənilib və Səlim Babullaoğlu şairdən tərcümə etdiyi bir neçə poetik nümunəni səsləndirib.

GÜNEL

525-ci qəzet.- 2011.- 10 fevral.- S.7.