Bakıda Azərbaycan-Litva biznes-forumu keçirilib

AZƏRBAYCAN VƏ LİTVA ARASINDA TİCARƏT DÖVRİYYƏSİ 30 MİLYON DOLLARA YAXINDIR

Dünən Bakı Biznes Mərkəzində Litva Respublikasının Seyminin sədri xanım İrena Dyaqutenin Azərbaycana rəsmi səfəri çərçivəsində İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan-Litva biznes forumu keçirilib. Tədbirdə rəsmi şəxslərlə yanaşı, Litva tərəfdən kənd təsərrüfatı, qida sənayesi, energetika, telekommunikasiya, tikinti, təhsil və s. sahələrdə fəaliyyət göstərən 20-dən çox iş adamı iştirak edib. Azərbaycan tərəfi isə biznes forumda analoji sahələrdə fəaliyyət göstərən 60-a yaxın iş adamı ilə təmsil olunub. Tədbirdə çıxış edən Milli Məclisin sədri Oqtay Əsədov və Litva Seyminin sədri xanım İrena Dyaqute iki ölkə arasında mövcud iqtisadi əlaqələr və əməkdaşlıq imkanları barədə məlumat verərək dövlətlərarası münasibətlər sistemində özünəməxsus yeri olan parlamentlərarası əlaqələrin inkişaf etdiyini vurğulayıb. Qeyd edilib ki, ölkələr arasında iqtisadi əlaqələrin genişlənməsində işgüzar görüşlərin, biznes forumların keçirilməsi əməkdaşlığın inkişafı baxımından əhəmiyyətlidir. Oqtay Əsədov iki ölkə arasında əlaqələrin bütün istiqamətlərdə inkişaf etməsini yüksək qiymətləndirib. Onun sözlərinə görə, iki ölkə arasında ticarət dövriyyəsi yüksələn xətlə inkişaf edir: “Azərbaycan və Litva arasında qeyri-neft sektorunu inkişaf etdirmək üçün böyük imkanlar mövcuddur. Əminəm ki, biznes-forumda aparılan müzakirələr gələcəkdə iki ölkə arasında birgə müəssisələrin yaradılmasına, qarşılıqlı investisiya yatırımına, ticarət dövriyyəsinin artmasına və iqtisadiyyatın bir çox sahələrində əməkdaşlığın inkişaf etdirilməsinə imkan yaradacaq”. Azərbaycanın iqtisadi uğurlarından danışan spiker ölkəmizin regionda lider mövqedə olduğunu bildirib: “Son 10 il ərzində ölkənin dövlət büdcəsi 15 dəfəyə qədər artıb, valyuta ehtiyatları 30 mlrd. dollara çatıb”. Xanım İrena Dyaqutene bu biznes-forumun Azərbaycanda Litva biznesinin inkişafına kömək edəcəyinə ümidini ifadə edib. “Hələ 2008-ci ildə Azərbaycanla Litva Cənubi Qafqazda ciddi tərəfdaş olublar. Bunun nəticəsi 2009-cu ilin sentyabrında Azərbaycanda Litva Ticarət Evinin açılması oldu”, – Dyaqutene belə deyib. Onun sözlərinə görə, sürətli iqtisadi inkişafa malik ölkə kimi Azərbaycanla əməkdaşlıq Litva hökumətini sevindirir: “Biznes-forum iki ölkə arasında mövcud əlaqələri dərinləşdirəcək, Litva biznesinin Azərbaycanda genişlənməsinə imkan yaradacaq. Son iki ildə ölkələrimiz arasında ticarət dövriyyəsi 30% artıb, lakin bu göstəricini artırmaq üçün geniş imkanlar var”. Spiker ölkəzinin informasiya texnologiyaları, ətraf mühitin qorunması və qida sənayesi sahəsində böyük təcrübəyə malik olduğunu bildirərək bu təcrübəni Azərbaycanla bölüşməyə hazır olduqlarını bildirib. Onun sözlərinə görə, biznes-forumda Litvanı tikinti, İKT, tekstil, tibb, kənd təsərrüfatı, energetika və təhsil sahələrində çalışan şirkətlər və qurumlar təmsil edir. Artıq Litvanın 9 ali məktəbində azərbaycanlı tələbələr təhsil alır və onların hamısı ödənişdən azad olunub. “Alternativ enerji mənbələrindən istifadə və ətraf mühitin mühafizəsi sahələrində də öz təcrübəmizi Azərbaycana təklif edirik. Litva qida sənayesi sahəsində istehsalla, süd, ketçup və digər məhsulların satışı ilə məşhurdur. Litvada istehsalın bu sahəsinin xüsusi çəkisi var. Sevindirici haldır ki, Azərbaycanın ticarət obyektlərində Litva istehsalı olan süd məhsulları satılır”. Onun sözlərinə görə, litvalı sahibkarlar biznesin inkişafı üçün bu sahədə tərəfdaşlıq münasibətlərinin gələcək inkişafında maraqlıdırlar. Litva Sahibkarlar Assosiasiyasının baş direktoru Alqimantas Akstinas bildirib ki, Litva ilə Azərbaycan arasında ticarət dövriyyəsi xeyli artıb: “İndi ölkələrimiz arasında ticarət dövriyyəsi 30 milyon dollara yaxındır. Amma bu, bizim bütün əməkdaşlıq imkanlarımızı göstərmir. 2009-cu illə müqayisədə dövriyyənin artım tempi 89 faiz təşkil edib. Burada Litva tərəfindən ixrac artıb”. Assosiasiya sədri deyib ki, Litvadan Azərbaycana maşınqayırma avadanlıqları, müxtəlif maşın ehtiyatları gətirilir: “Amma biz hesab edirik ki, daha çox imkanımız var. Biz xidmət sahəsində çox inkişaf etmişik. Bu sahəni bura gətirmək istəyirik. Azərbaycandan da Litvaya çoxlu məhsul idxal olunur. Bu, əsasən qida məhsulları, tərəvəz və meyvələrdir”. Biznes forumda AZPROMO-nun prezidenti Adil Məmmədov Azərbaycanın investisiya və ixrac imkanları, Azərbaycan İnvestisiya Şirkətinin icraçı direktorunun müavini Rövşən Nəcəf şirkətin iştirakı ilə həyata keçirilən layihələr, Litva Xarici İşlər Nazirliyinin nümayəndəsi Regimantas Yablonskas isə ölkəsinin biznes imkanları barədə təqdimatlarla çıxış edib. Tədbir çərçivəsində Azərbaycan və Litva haqqında qısa filmlər nümayiş olunub. Biznes forumda Litva Sahibkarlar Konfederasiyası və Azərbaycan Sahibkarlar (İşəgötürənlər) Təşkilatları Milli Konfederasiyası, həmçinin Vilnüs Universiteti və Azərbaycan Milli Elmlər Akademiyasının Kibernetika İnstitutu, Litvanın “İnta” şirkəti ilə Azərbaycanın “Kiber Ltd” şirkəti arasında əməkdaşlıq haqqında Anlaşma Memorandumları imzalanıb.

Ülkər NƏBİYEVA

525-ci qəzet.- 2011.- 10 fevral.- S.3.