Gənclər Təşkilatları Milli Şurası 15 yaşını qeyd etdi

Azərbaycan Respublikası Gənclər Təşkilatları Milli Şurası 15 illik yubileyi münasibətilə mərasim keçirib. “Gülüstan” sarayında keçirilən tədbirdə Milli Şuranın sədri, millət vəkili Fuad Muradov rəhbərlik etdiyi təşkilatın fəaliyətindən danışıb, qeyd edib ki, ötən 15 il ərzində həyata keçirilən layihələr, proqramlar əsasən gənclərə və cəmiyyətdə onları narahat edən məsələlərin həllinə yönəlib: “Milli Şura 21 noyabr 1995-ci ildə 11 gənclər təşkilatı tərəfindən təsis olunub. 1996-cı il yanvarın 31-də isə Azərbaycan Respublikası Ədliyyə Nazirliyi tərəfindən dövlət qeydiyyatına alınıb. Milli Şura Azərbaycan gənclərinin yeganə konfederativ strukturu, əməkdaşlıq mərkəzi, gənclər qurumlarının əlaqələndiricisi və gənclərin beynəlxalq inteqrasiyasını təşkil edən qurumdur. Hazırda Milli Şura öz ətrafında 70 təşkilatı birləşdirir. Şuranın üzv təşkilatları bütün bölgələrdə fəaliyyət göstərir. Şura Avropa Gənclər forumunun tam hüquqlu, BMT-nin iqtisadi-sosial şurasının məşvərətçi hüquqlu üzvüdür. İslam Konfransı Gənclər forumunun təsisçisi və ən aktiv üzvüdür. Azərbaycan gənclərinin, o cümlədən Milli Şuranın qarşısında duran ən ümdə məsələ ölkəmizin ərazi bütövlüyü istiqamətində atılan addımlardır. Milli Şura ölkə prezidenti İlham Əliyevin siyasətinə sadiq olaraq, bu istiqamətdə Azərbaycan reallıqlarını beynəlxalq aləmə çatdırır”.

Milli Şuranın tarixini və fəaliyyətini əks etdirən sənədli filmin nümayişindən sonra Baş nazirin müavini Əli Həsənov çıxış edib, O, Şuranın 15 illik yubileyinin qeyd edilməsinin Azərbaycan gəncliyinin müasir inkişaf yolunda olmasının göstəricisi kimi qiymətləndirib: “Xalqımızın ümummilli lideri Heydər Əliyev 1993-cü ildə ikinci dəfə siyasi hakimiyyətə qayıtdıqdan sonra Azərbaycan gəncliyinin strategiyasını müəyyənləşdirdi. Ulu öndərin siyasi kursunun layiqli davamçısı prezident İlham Əliyev isə bu strategiyanın icra mexanizmini açıqladı. Bu gün Azərbaycan gəncliyi cəmiyyətimizin müxtəlif sahələrində təmsil olunurlar. Mən bu tədbirin keçirilməsindən istifadə edib hökumət və dövlət məmurlarına da səslənmək istəyirəm. Əgər sizlər yaşlaşanda gələcək nəsillərdən özünüzə qarşı hörmət görmək istəyirsinizsə, gənclərə daha da qayğı ilə yanaşmanız gərəkdir”.

Gənclər və idman naziri Azad Rəhimov da Milli Şuranın uğurlarına sevindiyini dilə gətirib. Bildirib ki, təşkilat müxtəlif tədbirlər həyata keçirməklə, Azərbaycan gəncliyini öz ətrafında cəmləşdirə bilib: “Milli Şuranın həyata keçirdiyi tədbirlər rəngarəng və müxtəlifdir. Ona görə də gənclər bu təşkilat ətrafında sıx birləşiblər. Azərbaycan ictimaiyyəti bu təşkilatın gələcəyinə inanır. Ən əsası isə Azərbaycan gəncliyi bu təşkilat vasitəsilə bütün dünyada öz sözünü deyə bilir. Milli Şuranın fəaliyyətini tənzimləyən gənclərin arasından ölkəmiz üçün dəyərli olan siyasi liderlər yetişib. Milli Şuranın sədrləri, üzvləri bu gün dövlət qurumlarında, parlamentdə və digər yerlərdə təmsil olunurlar. Bu məktəb hazırda da davam etdirilir və ölkə gənclərinin maraqlarını ifadə edir”.

Rufik İSMAYILOV

525-ci qəzet.- 2011.- 19 fevral.- S.9.