Abbas Abdullanın “Seçilmiş əsərləri” təqdim olundu

Ötən gün Azərbaycan Yazıçılar Birliyinin (AYB) Natəvan klubunda şair Abbas Abdullanın “Seçilmiş əsərləri”nin və onun tərcüməsində Y.Kanevskinin “Emin ağa Borçalı” kitablarının təqdimat mərasimi gerçəkləşib. Mərasimi giriş sözü ilə AYB sədri, xalq yazıçısı Anar açıb: “Kitablarının təqdimatına yığışdığımız Abbas Abdullanı tanıtmağa ehtiyac yoxdur. Abbas Abdulla çox görkəmli şair, ədəbiyyatşünas, tərcüməçidir. Əslində bu tədbir fevral ayının 18-də baş tutmalı idi. Lakin Abbas müəllim tədbirin məhz bu günə keçirilməsini istədi. Bu gün bütün dünyada “Ana dili” günüdür. Tədbirin bu günə keçirilməsinin səbəbi də elə budur”.

Şair Qulu Ağsəs çıxışında A.Abdulla ilə tanışlıq xatirələrini dilə gətirdi. A.Abdullanı Rəsul Rza məktəbinin ləyaqətli davamçısı kimi təqdim edən Q.Ağsəs onun ən çox bəyəndiyi şeirlərini sadaladı: “Sən mənim yarımsan, Araz, ay Araz” şeiri Abbas Abdullanın qələmindən çıxan ən sevdiyim şeirlərdəndir. Yaradıcılığını mütəmadi izlədiyim Abbas Abdullanın bayatıları da özündə maraqlı mətləbləri və dövrün problemlərini əks etdirdiyinə görə maraq doğurur”.

“Abbas Abdulla ədəbiyyat aləmində özünəməxsus dəst-xətti, yaradıcılığı ilə seçilir. O, Azərbaycan dilinin, ədəbiyyatının ağırlığını çiyinlərində daşıyır. Abbas Abdulla yaradıcılığını, portretini, mənəvi aləmini, tərcümeyi-halını özünün “Kimliyim” şeirində açıb. Bu şeirdə şair anadan olması, ailəsi haqqında geniş məlumat verib. Onu da qeyd etmək istəyirəm ki, Abbas Abdulla ata kədəri, nisgili haqqında yazan şairlərdən biridir. Atasını erkən itirən şair bütün əksər şeirlərində bu kədəri əks etdirib. Abbas Abdulla həm də vətənpərvər şairlərimizdəndir. Onun üçün vətən anadan olduğu Kəpənəkçi kəndindən başlayır. Abbas Abdulla həm də “Borçalı bayatıları”nda Azərbaycanda yurd-kənd adlarını və adların izahatlarını yazan ilk şairlərdəndir. Onun qələmə aldığı “Göy üzünə” yazdığı şeiri isə fəlsəfi şeirlərin başlanğıcı adlandırmaq olar”. Şair Fikrət Sadıq çıxışında A.Abdullanın yüksək insani keyfiyyətlərini dilə gətirərək, onun yazdığı hər bir əsərin gələcək nəsillərə ərməğan olduğunu bildirib.

Digər qonaqlar da şairlə bağlı fikirlərini bölüşüb, ona yeni yaradıcılıq uğurları arzu ediblər. Sonda çıxış edən Abbas Abdulla yaradıcılığına göstərilən diqqətə görə hər kəsə minnətdarlığını bildirib.

Qeyd edək ki, “Seçilmiş əsərlər” kitabında A.Abdullanın indiyə qədər çap olunmuş əsərlərinin bir qismi toplanıb. Kitab şairin 70 illik yubileyinə hədiyyə olaraq AYB tərəfindən çap edilib. Kitabın önsöz müəllifi Nəriman Həsənzadədir.

“Emin ağa Borçalı” kitabının baş qəhrəmanı Borçalı mahalının mötəbər insanlarından biri sayılan Emin ağa Borçalının həyatına həsr olunub.

HÜSNİYYƏ

525-ci qəzet.- 2011.- 22 fevral.- S.6.