“Xocalı soyqırımı – Qan rəngində ağ gecə” adlı tədbir keçirilib

Dünən Qaçqın və Məcburi Köçkün Gənclər Təşkilatı, Gəncliyə Yardım Fondu və 149 saylı Ağdam köçkün orta məktəbinin birgə təşkilatçılığı ilə “Xocalı soyqırımı-Qan rəngində ağ gecə” adlı ədəbi-bədii tədbir gerçəkləşdirilib. Qaçqın və Məcburi Köçkün Gənclər Təşkilatının sədri Vüqar Qədirov Xocalı soyqırımının Azərbaycan xalqının tarixində silinməz izlər buraxdığını, 20-ci əsrin sonlarında ermənilər tərəfındən törədilən bu qətliamın heç bir insanlığa sığmayan bəşəri bir cinayət olduğunu bildirib. V.Qədirov Ermənistanın bu gün də öz havadarlarının dəstəyilə işğal etdiyi Azərbaycan torpaqlarını azad etməməsini, beynəlxalq hüqüqa meydan oxumaqda davam etməsini ATƏT-in Minsk qrupunun həmsədrlərinin və digər beynəlxalq təşkilatlarin Azərbaycana qarşı ikili standartlarla yanaşdıqlarının bir göstəricisi olduğunu vurğulayıb. Bütün bunlara baxmayaraq, Azərbaycan xalqının bir qarış da olsa torpağının Ermənistanın işğalında qalması ilə barışmayacağını bildirən V.Qədirov prezident İlham Əliyevin dəfələrlə Ermənistana və ona havadarlıq edən dövlətlərə ciddi mesaj verdiyini qeyd edib. O vurğulayıb ki, İlham Əliyevin Azərbaycanın ərazi bütövlüyünün danışıqlar mövzusu olmadığını və Azərbaycanın öz torpaqlarını hərbi yolla azad etmək hüququna malik olduğunu bildirməsi Ermənistanda böyük qorxu və təşviş yaradıb. Gəncliyə Yardım Fondunun vitse-prezidenti Salman Əliyev Xocalı soyqırımının tarixi bir cinayət olduğunu, bir şəhərin yer üzündən silinməsində, uşaqların, qocaların, qadınların məhv edilməsində, əsir və girovlara verilən ağır işgəncələrdə ermənilərlə bərabər insanlığa qarşı yönəlmiş bu cinayətə göz yuman dövlətlərin və beynəlxalq təşkilatların da az günahı olmadığını bildirib. S.Əliyev Gəncliyə Yardım Fondunun daim bu cür məsələlərə həssaslıqla yanaşdığını, qaçqın və məcburi köçkünlərlə bağlı mütəmadi olaraq humanitar xarakterli tədbirlər keçirdiklərini qeyd edib.

Tədbirin təşkilatçılarından olan 149 saylı Ağdam köçkün tam orta məktəbinin direktoru Arzu Möhsümova tarixə düzgün yanaşmanın zəruri olduğunu deyib. O, çıxışında böyüməkdə olan gənc nəslin təlim-tərbiyəsində hərbi-vətənpərvərlik təbliğatına xüsusi önəm verildiyini və şagirdlərə Ermənistanın Azərbaycana qarşı törətdiyi cinayətlərin və işğalının əsas mahiyyətinin düzgün çatdırılmasının vacibliyini vurğulayıb.

S.QARAYEVA

525-ci qəzet.- 2011.- 23 fevral.- S.4.