Antikorrupsiya tədbirləri
paketinin təqdimatı keçirilib
VÜQAR BAYRAMOV: “İQTİSADİYYATIN BÜTÜN SAHƏLƏRİNDƏ
STRUKTUR İSLAHATLARININ APARILMASINA EHTİYAC VAR”
Dünən İqtisadi və
Sosial İnkişaf Mərkəzi (İSİM) rüşvətxorluğa
qarşı mübarizənin gücləndirilməsi və
dayanıqlı nəticələrin əldə edilməsi məqsədilə
hazırladığı Anti-Korrupsiya Tədbriləri Paketinin
təqdimatını keçirib. Millət vəkillərinin,
dövlət komitələrinin, nazirliklərin nümayəndələrinin
iştirak etdiyi tədbirdə İqtisadi və Sosial
İnkişaf Mərkəzinin İdarə Heyətinin sədri
Vüqar Bayramov çıxış edərək,
İSİM-in hazırladığı təkliflər paketinin
əsas məqsədindən danışıb. Bildirib ki,
hazırlanmış paket iqtisadiyyatın bütün sahələrində
struktur islahatlarının aparılmasını nəzərdə
tutur:
“Antikorrupsiya tədbirləri
çərçivəsində struktur islahatları iqtisadi
idarəetmənin müxtəlif sektorlarını əhatə
etməlidir. İslahatlar nəticəsində “Azərsu” “
ASC-nin Meliorasiya və Su Təsərrüfatı Səhmdar Cəmiyyətinə
birləşdirilməsi və hər iki qurumun bazasında yeni
agentliyin- Dövlət Su Agentliyi yaradılması, “Azərenerji”SC-nin
Dövlət Neft Şirkətinə birləşdirilməsi,
Dövlət Gömrük Komitəsinin ləğv edilərək
Vergilər Nazirliyinin tərkibində idarə formasında fəaliyyət
göstərməsi, Kənd Təsərrüfatı
Nazirliyinin ləğv edilərək İqtisadi İnkişaf
Nazirliyinin tərkibinə verilməsi, Sosial Müdafiə
Fondunun ləğv edilərək departament şəklində Əmək
və Əhalinin Sosial Müdafiəsi Nazirliyinə birləşdirilməsi,
Sənaye və Energetika Nazirliyinin ləğv edilərək,
funksiyalarının bir qisminin Neft Şirkətinə verilməsi,
o cümlədən İqtisadi İnkişaf Nazirliyinin
bazasında Yanacaq Energetika Departamentinin
formalaşdırılması təmin olunmalıdır”. İqtisadçı
həmçinin sahibkarlıq subyektləri və əhali ilə
daha çox işləyən nazirliklərdə
Müşahidə Şuralarının yaradılmasını
da vacib sayıb. Onun qənaətinə görə, bu
şuraların tərkibinə yalnız dövlət
qurumlarının deyil, vətəndaş cəmiyyəti
institutlarının nümayəndələri daxil edilməlidir:
“İdxal-ixrac əməliyyatları üzrə Əlavə Dəyər
Vergisi üzrə ödənişlərin Dövlət
Gömrük Komitəsi tərəfindən alınması ləğv
edilməli və bu iş Vergilər Nazirliyinə həvalə
edilməlidir. Eyni zamanda xarici ticarət əlaqələrində
korrupsiya səviyyəsinin azaldılması məqsədilə
Azərbaycanın Dünya Ticarət Təşkilatına
üzvlüyü prosesinin sürətləndirilməlidir. Antikorrupsiya
tədbirlərinin tərkib hissəsi kimi İqtisadi
İnkişaf Nazirliyinin tərkibindəki Antiinhisar Departamenti
nazirlikdən ayrılaraq Rəqabətin Müdafiəsi
Agentliyi yaradılmalıdır. Agentliyə bazara müdaxilə,
inhisar hallarının qarşısının alınması
üçün ciddi səlahiyyətlər verilməlidir. Hansıki
MDB-nin əksər ölkələrində Rəqabətin
Müdafiəsi Agentliyi fəaliyyət göstərir. Bundan
əlavə dövlət şirkətlərinin audit
yoxlamaları beynəlxalq standartlara
uyğunlaşdırılmalıdır. Çünki Şəffaflığın
Gücləndirilməsi və Korrupsiyaya Qarşı
Mübarizə Milli Strategiyasında beynəlxalq
standartların tətbiq edilməsi bu sahədə vacib elementlərdən
biri kimi hesab edilir.Vergi Məcəlləsi üzrə risk təhlili
aparılmaldır. Müstəqil və tanınmış
xarici şirkət tərəfindən həyata keçirilməsi
tövsiyə edilən bu təhlil məcəllənin
korrupsiya üçün hansı imkanlar
yaratdığını müəyyənləşdirə
bilər”. V.Bayramov bildirib ki, elektron hökümətin elementlərindən
yalnız biznesdə deyil, dövlət qurumlarının fəaliyyətlərində
də istifadə olunmalıdır:
“Arayışlar və tələbnamələr
elektronlaşdırılmalıdır. Belə ki, inkişaf
etmiş və inkişaf etməkdə olan ölkələrdə
vətəndaşların kommunal xidmətlərə borcu,
yaşayış yerləri ilə bağlı
arayışlar elektronlaşdırılıb. Vətəndaşlar
heç bir dövlət qurumuna müraciət etmədən
arayışları çap edirlər. Həmçinin Vergilər
Nazirliyi tərəfindən “Elektron audit” sisteminin tətbiqi həyata
keçirilməlidir. Sistemin reallaşdırılması audit
işində şəffaflığın artmasına və
audit proseslərinin asanlaşdırılmasına səbəb
ola bilər. Elektron ticarətin inkişafı
üçün bu sahə ƏDV-dən azad edilməlidir. Bu
elektron ticarətin inkişafına yardım göstərməklə
yanaşı e-ticarətin daha da
leqallaşdırılmasına səbəb ola bilər.Bir
sıra Avropa ölkələrində olduğu kimi
rüblük bəyannamələr illik hesabatla əvəz
edilməlidir. Belə halda vergi müfəttişləri ilə
sahibkarların birbaşa ünsiyyəti azalar”. Daha sonra Təkliflər
Paketi ətrafında müzakirələr aparılıb.
Çıxış edən millət vəkili Qüdrət
Həsənquliyev korrupsiyaya qarşı mübarizənin
effektiv aparılması üçün siyasi islahatların həyata
keçirilməsini vacib hesab etdiyini söyləyib: “İdarəetmədə
islahatlar aparılmalıdır. Eyni zamanda ölkədə
böyük özəlləşdirmə keçirilməlidir.Azərbaycan
Dövlət Neft Şirkəti özəlləşdirilməlidir”.
İqtisadi Tədqiqatlar Mərkəzinin
İdarə Heyətinnin sədri Qubad İbadoğlu isə
struktur islahatları çərçivəsində Sosial
Müdafiə Fondunun ləğv edilərək departament şəklində
Əmək və Əhalinin Sosial Müdafiəsi Nazirliyinə
birləşdirilməsindən daha çox qeyri-dövlət
pensiya fondlarının yaradılmasını məqbul
sayıb. Millət vəkili Fəzail Ağamalı
korrupsiyaya qarşı mübarizənin effektli olmasında
ictimai nəzarətin mühüm olduğunu vurğulayıb.
Qeyd edib ki, struktur islahatları çərçivəsində
Azərbaycan Sənaye və Energetika Nazirliyinin ləğv
edilməsi deyil, fəaliyyətinin genişləndirilməsi
vacibdir: “Azərenerji” isə bu nazirliyə birləşdirilməlidir.
Bütün sferalarda nağd hesablaşmalar aradan
qaldırılmalıdır. Bu gün lisenziyalar üzrə
rüsumların məbləğləri bəlli deyil. Belə
məsələlər həll edilməlidir”.
Millət vəkili Fazil Mustafa
İSİM-in hazırladığı Təkliflər Paketini
proqram şəklində işlənib deputat qrupu tərəfindən
Nazirlər Kabinetinə təqdim olunmasını təklif
edib.
Tədbirdə Təhsil, Nəqliyyat,
Əmək və Əhalinin Sosial Müdafiəsi, Vergilər,
Ədliyyə Nazirliklərinin, Dövlət Neft Fondunun,
Gömrük Komitəsinin və digər dövlət
qurumlarının nümayəndələri, eləcə də
qeyri-hökümət təşkilatlarının rəhbərləri
də çıxış edərək öz fikirlərini
bölüşüblər.
Rufik İSMAYILOV
525-ci qəzet.- 2011.- 24 fevral.- S.2.