Xocalı faciəsilə bağlı kitablar təqdim olunub

Ötən gün M.F.Axundzadə adına Milli Kitabxanada Xocalı faciəsinin 19-cu ildönümü münasibəti ilə “Xocalı – şəhid şəhər” adlı kitab sərgisinin açılışı, həmçinin “Soyqırım cinayəti” və S.Məmmədovun “Xocalı soyqırımı” kitablarının təqdimat mərasimi gerçəkləşib.

Tədbir Milli Kitabxananın hazırladığı “Xocalı” adlı elektron məlumat bazasının təqdimatı ilə başlayıb. Bu məlumat bazasına “Soyqırım”, “Xocalı rayonu”, “Kitablar”, “Ermənilərin etirafı” başlıqlı bölmələr yerləşdirilib. Artıq neçə gündür ki, dünya oxucuları bu bazadan istifadə edirlər.

Mərasimi giriş sözü ilə açan kitabxananın direktoru Kərim Tahirov təqdim olunan “Xocalı soyqırımı” kitabçasının gənclərimizin və xarici qonaqların bu barədə məlumatlandırılması məqsədi ilə tərtib olunduğunu diqqətə çatdırıb: “Bu məlumat kitabçası Qarabağ döyüşlərində erməni təcavüzkarlarına qarşı vuruşan, ermənilərin azərbaycanlılara qarşı törətdikləri faciələri gözləri ilə görən polkovnik Sadir Məmmədov tərəfindən qələmə alınıb. Dünya ictimaiyyətinə müraciətlə başlanan bu nəşrdə Xocalının erməni faşistləri tərəfindən yerlə yeksan edilməsindən, dinc əhalinin şahidi olduqları hadisələrdən bəhs olunur. Eyni zamanda kitabçada vəhşicəsinə qətlə yetirilən insanların fotoşəkilləri də verilib”.

Mədəniyyət və turizm nazirinin I müavini Vaqif Əliyev bu faciəni Dağlıq Qarabağ münaqişəsi zamanı baş vermiş ən dəhşətli hadisələrdən biri adlandırıb: “Xocalı soyqırımını XX əsrin ən dəhşətli və qəddar faciələrindən biri hesab etmək olar. Bu faciə iki yüz ilə yaxın bir müddətdə erməni şovinist-miilətçiləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırımı siyasətinin davamı və ən qanlı səhifəsidir. Xocalı genosidi heç bir zaman Azərbaycan xalqının yaddaşından silinməyəcək”.

Tədbirdə Milli Kitabxananın hazırladığı 200-dən artıq kitab, jurnal və qəzet materiallarından ibarət “Xocalı – şəhid şəhər” sərgisi də nümayiş olunub.

HÜSNİYYƏ

525-ci qəzet.- 201`1.- 26 fevral.- S.17.