“İpək Yolu” II Beynəlxalq musiqi festivalı yekunlaşıb

“İpək Yolu” II Beynəlxalq musiqi festivalı çərçivəsində Azərbaycan Bəstəkarlar İttifaqının Üzeyir Hacıbəyli adına konsert salonunda vokal və xor musiqi konserti keçirilib. Konsertdə Azərbaycan bəstəkarları Ədilə Hüseynzadə, Ruhəngiz Qasımova, Adilə Yusifova, Vüqar Camalzadə, Günay Mirzəyeva və Rüfət Ramazanovun əsərləri ifa edilib.

Maraqla qarşılanan konsertdə, həmçinin Azərbaycan Dövlət Xor Kapellasının ifasında xalq mahnı və muğamlarımızın xor üçün işlənmələri – “Rast” muğamından fraqmentlər, “Səndən mənə yar olmaz”, “Gözəlim sənsən” mahnıları, “Şikəstə”, “Süsən sünbül”, “Bayatı-Şiraz” səsləndirilib.

Qeyd edək ki, Xor Kapellasının bədii rəhbəri və baş dirijoru Gülbacı İmanova, solistlər Aqşin Abdullayev və Mirpaşa Şükürovdur.

“İpək yolu” II Beynəlxalq musiqi festivalı çərçivəsində daha bir konsert proqrammı gerçəkləşib və bununla da festival yekunlaşıb. Konsert Azərbaycan Bəstəkarlar İttifaqının Üzeyir Hacıbəyli adına konsert salonunda baş tutub. “Novruz” muğam triosunun konsertində “Xalq ulduzu” müsabiqəsinin laureatı, xanəndə İlahə İbadovanı tarda Əli Məmmədov, kamançada Elnur Mikayılov müşayiət ediblər.

Türkiyə, İngiltərə, İsveç, Rusiya və digər ölkələrdə ölkəmizi layiqincə təmsil edən İ.İbadovanın ifasında Azərbaycan xalq mahnıları və muğam parçalarını xarici qonaqlar alqışlarla qarşılayıb.

Uğurla keçən konsertdən sonra Azərbaycan Bəstəkarlar İttifaqının sədri, xalq artisti Firəngiz Əlizadə çıxış edərək 4 gün davam edən festivalın Üzeyir Hacıbəylinin “Əsli və Kərəm” muğam operası ilə başladığını və muğamla da yekunlaşdığını bildirib.

AMEA-nın müxbir üzvü, millət vəkili Yaqub Mahmudov bu möhtəşəm tədbirin təşkilatçılarına minnətdarlıq edib və festivalın dünya xalqlarını bir-birinə yaxınlaşdırmaq baxımından böyük əhəmiyyət kəsb etdiyini dilə gətirib.

Beləliklə iyunun 28-dən start götürən II beynəlxalq musiqi festivalı başa çatıb.

HÜSNİYYƏ

525-ci qəzet.- 2011.- 5 iyul.- S.4.