Gəncədə Nizami Gəncəvinin 870 illiyilə bağlı sərgi açılıb

Dünən Gəncə Şəhər İcra Hakimiyyətinin qarşısındakı meydanda dahi Azərbaycan şairi Nizami Gəncəvinin 870 illiyinə həsr olunmuş sərgi açılıb. APA-nın Qərb bürosunun məlumatına görə, sərgi Nizami Gəncəvinin 870 illiyinə həsr olunmuş tədbirlər silsiləsindən Şəhər İcra Hakimiyyəti tərəfindən təşkil edilib. Tədbirdə şəhərin orta təhsil müəssisələri və ali məktəblərinin yaratdığı guşələrdə şairin müxtəlif illərdə nəfis tərtibatda nəşr olunmuş kitabları, Nizami Gəncəvi qəhrəmanlarının yağlı boya ilə çəkilmiş rəsmləri, şairin rəsmi olan müxtəlif ölçülü xalçalar, şagirdlərin çəkdiyi rəsmlər, Gəncənin qədim mədəniyyətini əks etdirən dulusçuluq, misgərlik, xəttatlıq nümunələri nümayiş olunur. Bütün rəsmlərin altında “Dahi Azərbaycan şairi Nizami Gəncəvi” sözləri yazılıb.

Nizami dövrünün qəhrəmanlarının obrazlarını yaradan şagirdlər müxtəlif məktəblərin pavilyonlarında “Xəmsə”dən səhnəciklər göstərib, şairin qəzəllərini deklamasiya ilə söyləyiblər. Sərginin diqqətçəkən eksponatlarından biri 25 saylı orta məktəbin yaratdığı guşədə yerli xəttatlar tərəfindən üzü köçürülmüş “Qurani-Kərim” olub. Şəxsi fondda saxlanılan “Qurani-Kərim” Gəncənin qədim nəsillərindən birinə məxsusdur və uzun əsrlərdir nəsildən-nəsilə keçərək günümüzə gəlib çatıb.

Sərgi axşam saatlarına kimi davam edib.

525-ci qəzet.- 2011.- 4 iyul.- S.4.