Azərbaycan Dövlət Opera və Balet Teatrının Simfonik Orkestri Münhen Festivalında

Azərbaycan Dövlət Akademik Opera və Balet Teatrının Simfonik Orkestri Avropada ən mötəbər musiqi festivallarından biri olan Münhen Opera sənətinə dəvət olunub. Bu dəvət teatrın rəhbərliyinə mötəbər festivalın bədii rəhbəri cənab Lüdviq Baumanın tərəfindən edilib. Teatrın mətbuat xidmətindən qəzetimizə verilən məlumata görə, Simfonik Orkestr bu il Münhen Opera festivalında artıq dördüncü dəfə iştirak edəcək. Orkestrin qastrol səfəri avqustun 4-dən 9-na kimi olan müddətə nəzərdə tutulur. Musiqiçilərimizin iştirak edəcəyi Qala-konsert avqustun 7-də baş tutacaq. Orkestrdə Qərbi Avropa bəstəkarlarının əsərləri ilə yanaşı Azərbaycan bəstəkarları – Üzeyir Hacıbəyli, Qara Qarayev, Fikrət Əmirov və Polad Bülbüloğlunun da musiqiləri ifa ediləcək.

Qeyd edək ki, simfonik orkestrin Almaniyaya qastrol səfəri Mədəniyyət və Turizm Nazirliyinin maliyyə dəstəyi ilə baş tutacaq.

HÜSNİYYƏ

525-ci qəzet.- 2011.- 6 iyul.- S.4