Vokalçı Ramil Qasımov Respublika Günündə zərdablılar üçün konsert verib

28 may Respublika Günü – Azərbaycan Cümhuriyyətinin yaranmasının 93-cü il ölkənin hər yerində geniş qeyd olunub. Azərbaycanın ən gənc “Koroğlu”su, istedadlı vokalçı Ramil Qasımov Respublika Günü münasibətilə Zərdab rayon ictimaiyyətinin, bölgə sakinlərinin qarşısında konsert proqramı ilə çıxış edib. Konserti M.Maqomayevin “Azərbaycan” mahnısı ilə açan Ramil Qasımov tədbirdə Ü.Hacıbəylinin, T.Quliyevin, Ş.Axundovanın, R.Hacıyevin, S.Ələsgərovun mahnılarını da səsləndirib. Müğənni konserti ümummilli lider Heydər Əliyevə həsr olunmuş “Məşəl kimi yanan ürək” mahnısı ilə yekunlaşdırıb.

R.Qasımov bölgələrdə silsilə konsertlər verməklə bağlı planını açıqlayıb: “Bölgələrimizdə, vətənimizin fərqli guşələrində konsert vermək çox gözəl bir hissdir. Burada insanlara yaxın olmaq, onlara canlı musiqi ərməğan etmək məni sevindirir. Bu silsilədən daha bir neçə konsertim nəzərdə tutulur və hər birinə çox ürəklə hazırlaşıram”.

GÜNEL

525-ci qəzet.- 2011.- 1 iyun.- S.7.