Azərbaycanlı rejissorun “Anlama”sı Özbəkistanda nümayiş olunub

Özbəkistanda yerli və əcnəbi gənclərin müəllif kinosu həftəsi keçirilir. APA-nın xəbərinə görə, Daşkənddə keçirilən festivalda Azərbaycan da təmsil olunur. Bu festivalda azərbaycanlı rejissor Murad Muradovun 2008-ci ildə Kino Akademiyasında “Bakı mən səni sevirəm” layihəsi əsasında çəkdiyi “Anlama” filminin nümayişi keçirilib. Bu film cəmiyyətin insanlara qarşı olan biganəliyindən bəhs edir. Festivalın təşkilatçıları Özbəkistan İncəsənət İnstitutunun məzunları Andrey Coy, Mahir Akimov və Şofik Yoldaşevdir. Festivalda Azərbaycanla yanaşı, Özbəkistan, Rusiya, Almaniya, Qırğızıstan iştirak edir. Festival çərçivəsində, eləcə də canlı musiqi ifaları və gənc rəssamların sərgisi də təşkil olunur.

525-ci qəzet.- 2011.- 9 iyun.- S.7.