“Azərbaycan İncəsənəti”nin yeni cildləri nəşr edilib

Gənclər və İdman Nazirliyinin maliyyə dəstəyi ilə həyata keçirilən layihə çərçivəsində “Bizim Nəsil” Gənclərin Regional İnkişaf Assosiasiyası İctimai Birliyi tərəfindən çap olunan “Azərbaycan İncəsənəti-təsviri sənət, dekorativ tətbiqi sənət, memarlıq (uşaqlar üçün ensiklopedik məlumat kitabı) kitabının növbəti 2-ci və 3-cü cildləri işıq üzü görüb. Gənclər və İdman Nazirliyinin mətbuat katibi Səmayə Məmmədovanın sözlərinə görə, kitabda qədim tarixə və zəngin bədii ənənələrə malik olan Azərbaycan incəsənətinin təsviri sənət, dekorativ tətbiqi sənət, memarlıq haqqında məlumatları toplanmışdır. İlk dəfə uşaqlar üçün nəşr olunan ensiklopediya xarakterli bu kitabda adları Azərbaycan incəsənəti tarixinə həkk olunmuş görkəmli sənətkarlar, özünəməxsus bədii məziyyətə malik dünya şöhrətli sənətkarlıq nümunələri haqqında yığcam məlumat verilir: “Məlumat üçün bildirim ki, kitabda incəsənətimizin tarixinə qızıl hərflərlə yazılmış sənət inciləri və onların müəllifləri barəsində kifayət qədər sadə və uşaq dili ilə söhbət açılmışdır. Materiallar əsasən incəsənətin aşağıdakı sahələrini əhatə etmişdir: rəngkarlıq, qrafika, heykəltəraşlıq, dekorativ-tətbiqi sənət, memarlıq”. S.Məmmədova qeyd edib ki, kitabda ilk dəfə olaraq gənclər və uşaq yaradıcılığına həsr olunmuş ayrıca bölmələr, rəngli təsvir materialları daxil edilib ki, bu da yazılanların əyani və dolğun qavranılmasına kömək edir. Bu səpgili çap məhsulunun ölkəmizdə uşaqlar üçün hazırlanmadığını nəzərə alsaq, kitabın əhəmiyyətini bir daha görmək mümkündür. S.Məmmədova vurğulayıb ki, kitabın tərtibçiləri Azərbaycanın əməkdar incəsənət xadimi Ziyadxan Əliyev və gənc sənətşünas Aslan Xəlilovdur.

S.QARAYEVA

525-ci qəzet.- 2011.- 10 iyun.- S.7.