“Polşadakı Azərbaycan siyasi mühacirəti irsindən” kitabının təqdimatı olub

TƏRTİBÇİSİ VƏ ELMİ REDAKTORU VİLAYƏT QULİYEV OLAN BU NƏŞRDƏ AZƏRBAYCAN TARİXİLƏ BAĞLI MÜHÜM MƏTLƏBLƏR İŞIQLANDIRILIB

Azərbaycan Milli Elmlər Akademiyasının (AMEA) Mərkəzi Elmi Kitabxanasında Azərbaycanın Macarıstandakı səfiri Vilayət Quliyevin tərtibçisi və elmi redaktoru olduğu “Polşadakı Azərbaycan siyasi mühacirəti irsindən” kitabının təqdimat mərasimi keçirilib. Tədbirdə giriş sözüylə çıxış edən tədqiqatçı Asif Rüstəmli V.Quliyevin elmi fəaliyyəti, indiyə qədər nəşr olunan kitablarının mövzusu və əhəmiyyəti barədə məlumat verib. A.Rüstəmli iştirakçıları təqdim olunan yeni kitab haqda da məlumatlandırıb.

Mərasimdə çıxış edən AMEA Ədəbiyyat İnstitutunun direktoru Bəkir Nəbiyev bildirib ki, kitabda Azərbaycan siyasi mühacirət nümayəndələrinin 1930-cu illərdə Polşada dərc edilən və elmi ictimaiyyətə məlum olmayan publisistik və tarixi-ədəbi irsinin nümunələri toplanıb, Məhəmməd Əmin Rəsulzadə, Mirzəbala Məmmədzadə, Mir Yaqub və Xalq Cümhuriyyətinin digər görkəmli xadimlərinin azadlıq mübarizəsi işıqlandırılıb. B.Nəbiyev müəllifin alim və diplomat kimi gördüyü işləri yüksək qiymətləndirib, onu ən fəal və fədakar tədqiqatçılardan biri olaraq gördüyünü bildirib. Akademik qeyd edib ki, Vilayət Quliyevin son illərdə apardığı elmi tədqiqatlar da elə diplomatik fəaliyyətinin mühüm bir hissəsi kimi dəyərləndirilə bilər.

Təqdimat mərasiminə telekörpü vasitəsilə qatılan V.Quliyev isə deyib ki, bu il Azərbaycan dövlət müstəqilliyinin bərpasının 20-ci ildönümünü qeyd edəcək və kitab bu əlamətdar hadisəyə həsr olunub: “Azərbaycan qarşısında hər birimizin borcumuz var. Bunu harada olmağımızdan asılı olmayaraq yerinə yetirməliyik. Kitabda ilk dəfə dünyanın siyasi xəritəsinə “Azərbaycan” adını gətirənlərin sonradan bu ideya uğrunda apardıqları mübarizə əks olunub”.

Daha sonra Ədəbiyyat İnstitutunun direktor müavini, tanınmış alim Teymur Kərimli çıxış edib (onun çıxışı bu sayımızda dərc olunub).

Sonra professor Qəzənfər Paşayev, Azərbaycan Yazıçılar Birliyinin katibi Rəşad Məcid, professor Nazif Qəhrəmanlı Vilayət Quliyevin elmi yaradıcılığı barədə, onun əsərlərinin önəmliliyi haqda çıxış ediblər. Tarix İnstitutunun direktor müavini Cəbi Bəhramov bu kitabın tarixçilər üçün də dəyərli məxəz olduğunu vurğulayıb.

Sonda Vilayət Quliyev tədbirə qatılanlara minnətdarlığını bildirib, səslənən fikirlərə münasibətini açıqlayıb, düşüncə və mülahizələrini bölüşüb.

525-ci qəzet.- 2011.- 14 iyun.- S.7.