“Azərbaycan – doğma diyar” festivalı başlayıb

YUNESKO-nun 2005-ci il oktyabrın 20-də qəbul etdiyi “Mədəni özünüifadə müxtəlifliyinin qorunması və təşviqi haqqında Konvensiya”ya uyğun olaraq ölkəmizdə yaşayan milli azlıq və etnik qrupların mədəniyyəti Azərbaycan mədəniyyətinin tərkib hissəsi kimi qorunur və inkişaf edir. Bu xalqların milli mədəniyyətinin, incəsənətinin, adət-ənənələrinin və dilinin qorunub saxlanılması üçün məqsədyönlü iş aparılır.

Mədəniyyət və Turizm Nazirliyinin təşəbbüsü və təşkilatçılığı ilə 2006-cı, 2008-ci illərdə “Azərbaycan-doğma diyar” devizi altında keçirilmiş azsaylı xalqların incəsənəti festivalı respublikanın ictimai-mədəni həyatında mühüm hadisə kimi yadda qalıb.

Nazirliyin mətbuat xidmətindən verilən məlumata görə, görülən işlərin davamı olaraq ölkədə yaşayan milli azlıq və etnik qrupların mədəni irsinin qorunub saxlanılması və inkişaf etdirilməsi, habelə xalqlar arasında qarşılıqlı anlaşma və tarixi dostluq münasibətlərinin möhkəmləndirilməsi məqsədilə Heydər Əliyev Fondunun dəstəyi, Mədəniyyət və Turizm Nazirliyinin təşkilatçılığı ilə iyunun 14-dən 18-dək “Azərbaycan – doğma diyar” devizi altında milli azlıqların III Respublika incəsənəti festivalı gerçəkləşəcək.

Festivalın təşkilat komitəsi yaradılmış, nazirliyin müvafiq şöbələri tədbirin keçirilməsinə səfərbər olunaraq, festivalın emblemi, afişası, dəvətnamələri hazırlanıb. İyunun 16-da Muzey Mərkəzində “Qloballaşma dövründə Azərbaycanda etnik mədəniyyət” mövzusunda dəyirmi masa, daha sonra 5 dildə “Azərbaycanda yaşayan xalqların mahnıları” CD diski ilə bağlı tədbir keçirilməsi planlaşdırılır.

Lənkəran, Şəki şəhər, Astara, Masallı, Lerik, Balakən, Zaqatala, Qax, Qəbələ, Quba, Qusar, Saatlı, İsmayıllı, Şabran rayon mədəniyyət və turizm şöbələri tərəfindən azsaylı xalqların bədii kollektivlərinin Bakı şəhərinə ezam edilməsi və festivalda iştirakı təmin olunub. Festivalın yekun konserti iyunun 18-də Azərbaycan Dövlət Akademik Opera və Balet Teatrında baş tutacaq.

HÜSNİYYƏ

525-ci qəzet.- 2011.- 15 iyun.- S.7.