Milli azlıqların III Respublika incəsənəti festivalı yekunlaşıb

Opera və Balet Teatrında “Azərbaycan – doğma diyar” devizi altında milli azlıqların III Respublika incəsənəti festivalının yekun konserti gerçəkləşib. Konsert rəqs ansamblının rəqsləri ilə start götürüb.

Tədbirdə mədəniyyət və turizm naziri Əbülfəs Qarayev çıxış edərək Azərbaycanda yaşayan milli azlıq və etnik qrupların mədəni irsinin qorunub saxlanılması və inkişaf etdirilməsi, habelə xalqlar arasında qarşılıqlı anlaşma və tarixi dostluq münasibətlərinin möhkəmləndirilməsi məqsədilə bu cür tədbirlər böyük əhəmiyyət daşıdığını diqqətə çatdırıb: “Biz çalışırıq ki, Azərbaycanda yaşayan hər bir xalqın adət-ənənələrini, mədəni irsini qoruyaq. Eyni zamanda bütün bunlar gələcək nəsillərə çatdırılmalıdır. Bilirsiniz ki, biz ənənəyə sadiq qalaraq artıq üçüncü dəfədir, azsaylı xalqların böyük mədəniyyət festivalını keçiririk. Görülən işlərin davamı olaraq ölkədə yaşayan milli azlıq və etnik qrupların mədəni irsinin qorunub saxlanılması və inkişaf etdirilməsi, habelə xalqlar arasında qarşılıqlı anlaşma və tarixi dostluq münasibətlərinin möhkəmləndirilməsi məqsədi ilə nazirlik tərəfindən bu festivalın 2 ildən bir keçirilməsi nəzərdə tutulub. Festival çərçivəsində “Azərbaycanın ənənəvi musiqi atlası” və Azərbaycan etnik musiqisinə həsr olunmuş albom hazırlanıb, respublikanın görkəmli alimlərinin iştirakı ilə təşkil edilmiş “Azsaylı xalqların mədəni irsi və müasirlik”, “Milli azlıqların mədəni irsinin qorunması” mövzularında elmi konfranslarda maraqlı məruzələr dinlənilib. Bu zamana kimi keçirilən festivallarda respublikamızın 15-dək rayonunda fəaliyyət göstərən və demək olar ki, bütün milli azlıq və etnik qrupları təmsil edən, 800 nəfər iştirakçını özündə birləşdirən 40-dan çox kollektivin çıxışları tamaşaçılar tərəfindən böyük maraqla qarşılanıb”.

Gecədə Lənkəran şəhər “Nənələr” talış folklor xalq mahnı və rəqs kollektivinin, “Suvar” ləzgi mahnı və rəqs ansamblının, Rus Mədəniyyət Mərkəzinin, Balakən rayonundakı “Cahan” avar folklor qrupunun, Qəbələ rayonu “Cəngi” udin folklor ansamblının, Azərbaycanın Yəhudi Mədəniyyət mərkəzinin və digər kollektivlərin çıxışları böyük maraqla qarşılanıb.Sonda fərqlənən kollektivlərə nazirliyin xüsusi diplomları təqdim edilib.Qeyd edək ki, festival Heydər Əliyev Fondunun dəstəyi, Mədəniyyət və Turizm Nazirliyinin təşkilatçılığı ilə həyata keçirilib.

HÜSNİYYƏ

525-ci qəzet.- 2011.- 21 iyun.- S.7.