Yazıçılar Birliyində “2004-2010-cu illərdə Azərbaycan poeziyası” müzakirə olunub

Azərbaycan Yazıçılar Birliyinin (AYB) “Natəvan” klubunda “2004-2010-cu illərdə Azərbaycan poeziyası” mövzusunda dəyirmi masa keçirilib. APA-nın məlumatına görə, mövzu ilə bağlı məruzəni “Ulduz” jurnalının redaktoru, şair Qulu Ağsəs təqdim edib. Məruzəçi bildirib ki, onun məruzəsi əsasən orta və yaşlı nəslin yaradıcılığı haqqındadır: “Burada bütün mətbu orqanlarını əhatə etməyə çalışmışam. Təkcə Azərbaycan Yazıçılar Birliyinin mətbu orqanlarında deyil, portallarda gedən yazılara da toxunmuşam”.

Qulu Ağsəs deyib ki, məruzəsində yazarların bəzilərinin adlarını sadalamaqla keçib, bəzilərinin yaradıcılığı üzərində ayrıca dayanıb. Məruzəçi oxuduğu yazıları üç hissəyə bölüb: “Burada 50-60 adamın adını çəkmişəm, 20-si haqqında da danışmışam. Mən bu yazıları oxudum, həm əsəbiləşdim, həm sevindim, həm kədərləndim. Üç qisim şeirlərə rast gəldim – biabırçı, ortabab və əla şeirlərə. Sonda yenə sevindim, ona sevindim ki, çağdaş Azərbaycan şeiri bu gün də mənim ürəyimə dəyirsə, deməli, burada sevinməli nə isə var. Çünki poeziyanın ən böyük məqsədi insan könlünə toxunmaqdır. Burada da mən ürəyimə toxunan yazılara rast gəldim. Azərbaycan poeziyası ölməyib”.

Tədbirə AYB sədri, xalq yazıçısı Anar, qurumun katibləri xalq şairi Fikrət Qoca, Arif Əmrahoğlu, “525-ci qəzet”in baş redaktoru Rəşad Məcid, şair Paşa Qəlbinur və digərləri qatılıblar. Dəyirmi masa Qulu Ağsəsin Azərbaycan poeziyası ilə bağlı məruzəsinin müzakirəsi ilə davam etdirilib.

525-ci qəzet.- 2011.- 3 mart.- S.7.