Klassik musiqi mədəniyyətimizə daha bir töhfə

Azərbaycanın milli musiqi mədəniyyətinə hər zaman hörmətlə yanaşan və bu istiqamətdə görülən işləri dəstəkləyən “Azərsun Holdinq” Müslüm Maqomayev adına Azərbaycan Dövlət Flarmoniyasında “Azərbaycan Bəstəkarlarının Antologiyası”nın təqdimat mərasimini keçirib. Layihənin müəllifi əməkdar incəsənət xadimi Ülviyyə Hacıbəyovadır. Dahi bəstəkar Üzeyir Hacıbəyovun əbədi xatirəsinə həsr olunan bu layihənin təqdimetmə mərasiminə Azərbaycanın tanınmış mədəniyyət xadimləri və ictimai qurumların nümayəndələri, tanınmış bəstəkarlar, sənət adamları, eləcə də musiqisevərlər dəvət olunmuşdu. Qeyd edək ki, “Azərbaycan Bəstəkarlarının Antologiyası” 15 diskdən ibarət olub, 140-dan çox Azərbaycan bəstəkarlarının yaradıcılığını əhatə edən bir layihədir. Bu layihədə həm Azərbaycan Bəstəkarlar İttifaqının üzvlərinin, həm həvəskar bəstəkarların, həm də müxtəlif müsabiqələrdə yer tutmuş tələbə bəstəkarların əsərləri əksini tapıb. Azərbaycan musiqi klassiklərinin piano üçün yazılmış əsərləri, demək olar ki, külliyat şəklində burada özünə yer tapıb.

525-ci qəzet.- 2011.- 4 mart.- S.7.