“İçərişəhərin əbədi sakini” – böyük kəramət sahibi haqqında yeni kitabın təqdimatı olub

Ötən gün Azərbaycan Yazıçılar Birliyinin “Natəvan” klubunda tarixçi-jurnalist Təranə Cəbiyevanın “İçərişəhərin əbədi sakini” adlı kitabının təqdimat mərasimi keçirilib. Kitab böyük kəramət sahibi ulu Seyyid Mir Möhsün Ağanın əziz xatirəsinə həsr olunub. Kitaba Ağanı tanıyan, sağlığında onunla yaxın olan insanların, onun yaxın qohumlarının xatirələri də daxil edilib. Qeyd edək ki, bu nəşr müəllifin “Bülbülə İmamzadəsi”, “Gənc müəllim və özünü təhsil”, “Güzdəkli Sona xanım”, “Bir ömrün taleyi” adlı kitablarından sonra oxucularla beşinci görüşüdür. Tədbiri Azərbaycan Yazıçılar Birliyinin əməkdaşı, şair Ədalət Əsgəroğlu açaraq Mir Möhsün Ağa haqqında kitab yazmağın qələm sahibindən cəsarət və məsuliyyət tələb etdiyini bildirib: “Gərək insan o qədər saf, təmiz qəlbə sahib, islam və insan fəlsəfəsinə dərindən bələd ola ki, belə bir əsəri ərsəyə gətirə bilə. Mən Təranə xanımı belə bir kitab yazdığı üçün həm təbrik edirəm, həm də ona minnətdarlığımı bildirirəm”. Təqdimatda iştirak edən şair-publisist Teyyub Qurban Mir Möhsün Ağanın xatirəsinə həsr olunan bu kitabı yazmaqla Təranə Cəbiyevanın çox savab bir əməl həyata keçirdiyini qeyd edib.

Şairlər Abbas Abdulla, Dayandur Sevgin və başqa iştirakçılar da kitabın əhəmiyyətli bir toplu olduğu fikrini önə çəkiblər.

Tədbirin sonunda çıxış edən Təranə Cəbiyeva kitabın necə ərsəyə gəlməsindən danışıb: “Mən “Içərişəhərin əbədi sakini” kitabını yazarkən ağlıma da gətirməzdim ki, bu kitabı cəmisi bir aya tamamlayacam. Ancaq Ağanın cəddi sözün əsl mənasında mənə kömək oldu və mən bu kitabı bir ay içində yazıb başa çatdıra bildim. Ağa haqqında eşitdiyim möcüzələr mənim həmişə onun kəramətinə olan inamımı artırıb. Mir Möhsün Ağa haqqında mətbuatda ilk yazım 2006- cı ildə işıq üzü görüb. İndi o gündən 4 il keçir. Bu 4 il ərzində Bakı kəndlərinin tarixi ilə bağlı araşdırmalarda həmişə sadə insanların Ağanın möcüzələri ilə bağlı fikirləri məni heyrətə salıb. Mir Möhsün Ağa haqqında çoxdan bəri yığılıb qalan duyğularımı geniş oxucu kütləsi qarşısına çıxartmağım isə Ağanın ölümündən 60 il keçəndən sonra, 2010- cu ilə təsadüf etdi”. Çıxışının sonunda müəllif kitabın ərsəyə gəlməsində əməyi olan və Mir Möhsün Ağa haqqında dolğun məlumatlar çatdıran insanlara öz təşəkkürlərini bildirib.

GÜNEL

525-ci qəzet.- 2011.- 4 mart.- S.7.