“Mingəçevir leysanı”nın oxucularla daha bir görüşü

Bu yaxınlarda “Mingəçevir leysanı” ədəbi-bədii jurnalının növbəti sayı oxuculara təqdim edilib. Jurnalın “Poeziya” bölməsinə Zakir Ağdamlının, Bəstinin, Qüdrət Məmmədovun, Elşən Əzizin, Humay Məmmədovanın, Murad Heydəroğlunun, Gültəkin Tağıyevanın, və İsmayıl İmanzadənin şeirləri daxil edilib. “Nəsr” guşəsində Svetlana Məcidovanın “Məhəbbət”, Fəxrəddin Əzizin “Görüş”, Eldəniz Cəfəroğlunun “Tüpürcək”, Günel Əliyevanın “Hamısını özün etmisən”, Gülnarə Dünyanın hekayələri, Zümrüd Rəhimovanın “Təhminə” poevsti və Durdı Baydıyevanın “Yeni il axşamı” adlı yumoristik hekayəsi (Nazim Saniyevin tərcüməsində) verilib. S. Məcidovanın “Məhəbbət” hekayəsində iki gəncin bir–birinə olan saf sevgisindən bəhs olunur. Ləman və Rəşad adlı vətənpərvər gənclərin sevgi hekayəsində Qarabağ müharibəsinin qanlı-qadalı illərində Rəşadın cəbhədə göstərdiyi igidlik, Ləmanın onu böyük məhəbbətlə gözləməsi təsirli şəkildə təsvir edilir. Digər maraqlı bir hekayə də Fəxrəddin Əzizin “Görüş”üdür. Bu hekayədə Şəmsiyyə adlı qız onu dəlicəsinə sevən, əhd-peyman bağladığı Seyrana vəfasızlıq edib başqa biri ilə evlənir. Seyran Hərbi xidmətdən qayıdandan sonra Şəmsiyyənin ailə qurduğunu eşidir və həyatdan küsür. Aradan uzun illər ötəndən sonra təsadüfən onlar yenidən görüşürlər. Məlum olur ki Şəmsiyyə ərindən ayrılıb.

Seyranla yenidən qovuşan Şəmsiyyə səhv addım atdığını etiraf edir. Hekayə nikbin sonluqla, Şəmsiyyə ilə Seyranını qovuşması ilə bitir. Zümrüd Rəhimovanın “Təhminə” povestində isə Tahirə adlı gənc bir qızın acı taleyi əks olunub.

Toplunun “Publisistika” bölməsində İsamyıl Mərcanlının alim Saleh İbrahimovun 80 illik yubileyinə həsr etdiyi “İstedadlı alim, aqil insan”, Eyyub Cabbaroğlunun “Dünya heç kimin” və Ramiz İsmayılovun “Bayraqdar” məqalələri yer alıb. Jurnalın “Tənqid və ədəbiyyatşünaslıq” bölməsində isə Kifayət Əliyevanın qələmə aldığı “Əli bəy Hüseynzadə və “Füyuzat” jurnalı” və Məmməd Mərzilinin “Qarabağsız döyünən ürək” başlıqlı yazıları öz əksini tapıb.

GÜNEL

525-ci qəzet.- 2011.- 5 mart.- S.17.