Xalq yazıçısı İsmayıl Şıxlının xatirə lövhəsi açıldı

Ötən gün xalq yazıçısı İsmayıl Şıxlının uzun illər yaşadığı Üzeyir Hacıbəyli küçəsindəki 27 nömrəli binanın qarşısında onun xatirə lövhəsinin açılış mərasimi gerçəkləşib. Mərasimi mədəniyyət və turizm nazirinin müavini Ədalət Vəliyev açaraq, unudulmaz sənətkarın həyat və yaradıcılığından danışıb: “Azərbaycan ədəbiyyatının ən parlaq simalarından biri olan İsmayıl Şıxlının məşhur “Dəli Kür” romanı və roman əsasında çəkilmiş eyni adlı filmi onu milyonların sevimlisinə çevirib, həm ədəbiyyat, həm kino ictimaiyyəti arasında böyük qələm sahibi kimi şöhrətləndirib”. Azərbaycan Yazıçılar Birliyinin sədri, xalq yazıçısı Anar görkəmli qələm sahibinin ədəbiyyatımızdakı özünəməxsus yerindən danışaraq, “Dəli Kür” romanını xüsusi vurğulayıb. Anar İ.Şıxlının yaddaşlarda həm böyük yazıçı, həm də müdrik ziyalı kimi qaldığını diqqətə çatdırıb: “Yazıçının müxtəlif illərdə 20-dən artıq kitabı nəşr olunub.

O, Azərbaycan Yazıçılar İttifaqının katibi, “Azərbaycan” jurnalının baş redaktoru, Azərbaycan Yazıçılar İttifaqının birinci katibi, SSRİ Yazıçılar İttifaqının katibi kimi məsul vəzifələrdə çalışıb, Ali Sovetin və Azərbaycan Milli Məclisinin deputatı olub”. Milli Məclisin mədəniyyət komitəsinin sədri, AMEA-nın müxbir üzvü Nizami Cəfərov İ.Şıxlının “Cəbhə gündəlikləri”ndən tutmuş “Mənim ölən dünyam” əsərinə qədər böyük yaradıcılıq yolu keçdiyini dilə gətirib.

Sonda yazıçının oğlu, “Ayna-Zerkalo” qəzetinin baş redaktoru tanınmış jurnalist Elçin Şıxlı atasının xatirəsini əbədiləşdirmək məqsədi ilə imzaladığı sərəncama görə prezident İlham Əliyevə minnətdarlıq ünvanlayıb. O, mərasimin təşkilatçılarına və iştirakçılarına təşəkkürünü bildirib.

Sonda heykəltəraş Natiq Əliyevin hazırladığı barelyefin üzərindəki örtük götürülüb.

HÜSNİYYƏ

525-ci qəzet.- 2011.- 8 mart.- S.7.