Bakıda məişət zorakılığına dair konfrans keçirilib

ELMİRA SÜLEYMANOVA: “QADINLARIN SAYININ AZALMASININ KÖKÜNDƏ MƏİŞƏT ZORAKILIĞI DURUR”

Dünən ATƏT-in Bakı ofisi Ailə, Qadın və Uşaq Problemləri üzrə Dövlət Komitəsi ilə birgə “Məişət zorakılığının qarşısının alınması haqqında” qanunun implementasiyası: məlumatlandırma və beynəlxalq təcrübə” mövzusunda konfrans keçirib. Tədbirin açılışında çıxış edən ATƏT-in Bakı ofisinin rəhbəri, səfir Əli Bilgə Cankorel bildirib ki, konfransın təşkilində əsas məqsəd başqa ölkələrin təcrübəsini tətbiq etməklə, məişət zorakılığının qarşısının alınması ilə bağlı yeni qanunun icrasına dair müzakirələr aparmaq, hökumət və vətəndaş cəmiyyətinin nümayəndələri arasında əməkdaşlığı daha da genişləndirməkdir. Onun fikrincə, məişət zorakılığının qarşısının alınması haqqında qanunun qəbul olunması, gender bərabərliyi və uşaqlar da daxil olmaqla, ən çox qayğıya ehtiyac olan vətəndaşların müdafiəsi, beynəlxalq öhdəliklərin yerinə yetirilməsi istiqamətində Azərbaycanın irəli doğru atdığı çox önəmli addımdır. Səfir qeyd edib ki, məişət zorakılığına qarşı mübarizənin dəstəklənməsi ATƏT-in Bakı Ofisinin bu il üçün əsas prioritetlərindəndir. İl ərzində ATƏT-in Bakı ofisi bununla bağlı silsilə tədbirlər keçirəcək: “İl ərzində qanunun icrasını dəstəkləmək məqsədilə regionlarda dəyirmi masalar təşkil ediləcək. Yeni təşkil olunmuş yardım mərkəzlərinin işçiləri və hüquq-mühafizə orqanları üçün ixtisaslaşdırılmış təlimlər keçiriləcək. Məişət zorakılığına qarşı milli və regional kanallarda maarifləndirici proqramlar təşkil olunacaq. İl ərzində ATƏT məişət zorakılığı qurbanları üçün regionlarda “qaynar xət”lər yaradacaq”. Ailə, Qadın və Uşaq Problemləri üzrə Dövlət Komitəsinin sədri Hicran Hüseynova isə deyib ki, qanunun qəbulu hələ problemlərin həlli demək deyil: “İnsanlar dərk etməlidirlər ki, bu qanun niyə qəbul olunub və ondan necə istifadə etmək olar”. Ombudsman Elmira Süleymanova isə deyib ki, Azərbaycan cəmiyyətində kişilərin sayı kəskin surətdə artmaqdadır. “Bu, bizi narahat etməlidir. Dövlət Statistika Komitəsinin son məlumatına görə, Azərbaycan əhalisi arasında qadınların sayı 51 faizdən 46 faizə düşüb”. Qadınların sayının azalmasının əsas səbəblərindən birinin məişət zorakılığı olduğunu deyən Süleymanova məişət zorakılığının təhlilinin və dəqiq statistikasının aparılmasını və bunun nəticəsində problemlə mübarizədə konkret mexanizmlərin hazırlanmasını vacibliyini vurğulayıb. Onun sözlərinə görə, kriminal abortlar, cinsinə görə ana bətnində dölün məhv edilməsi son illər kişilərinin sayının artmasına səbəb olub: “Məişət zorakılığının müxtəlif formaları insan hüquqlarının pozulması ilə sıx bağlıdır. Məişət zorakılıqlarının kökündə cinsi mənsubiyyətə görə ayrı-seçkiliyin aradan qaldırılmaması dayanır”. Ombudsman bildirib ki, qadınlara qarşı ayrı-seçkilik ailədə, əmək bazarında, sahibkarlıqda, güzəştli kreditlərin verilməsində müşahidə olunur: “Nəticədə qadınlar iqtisadi baxımdan həyat yoldaşlarından asılı vəziyyətə düşür və onların ailələrdə qərar verə göstəriciləri zəifləyir. Problemlə dərin mübarizə aparmaq üçün dəqiq statistika olmalıdır”. Daha sonra tədbir zamanı məişət zorakılığının Azərbaycanda əhatə dairəsi və təsiri haqqında söhbət açılıb, qanunların detalları müzakirə olunub. Eyni zamanda tədbir iştirakçılarına beynəlxalq təcrübə və mütərəqqi nümunələr haqqında məlumat verilib və bu təcrübələrin Azərbaycana münasib olub-olmadığına dair hökümətlə vətəndaş cəmiyyəti arasında müzakirələr aparılıb.

P.SULTANOVA

525-ci qəzet.- 2011.- 12 mart.- S.6.