Bakıda “Muğam aləmi” çərçivəsində silsilə tədbirlər keçirilib

Azərbaycan Bəstəkarlar İttifaqında “Muğam aləmi” II Beynəlxalq Muğam Festivalı çərçivəsində keçirilən “Azərbaycan muğamı və Orta Şərq musiqisi” mövzusunda elmi simpozium martın 17-də öz işini bölmə iclasında davam etdirib. APA-nın məlumatına görə, iclasa amerikalı professor Yurgen Elsner və azərbaycanlı sənətşünas Sürəyya Ağayeva sədrlik edib. İlk olaraq kanadalı alim Robert Simms “Məhəmməd Rza Şəcərianın avazında əsas struktur və proseslər” mövzusunda məruzə ilə çıxış edib.

Gün ərzində Azərbaycan, Tunis, Finlandiya və rusiyalı musiqişünasların ümumilikdə 5 məruzəsi dinlənilib. Günün ikinci yarısında simpoziumun yekunlarına həsr olunmuş dəyirmi masa keçirilib.

Martın 17-də Azərbaycan Dövlət Filarmoniyasının kamera və orqan musiqisi zalında II Beynəlxalq muğam müsabiqəsinin püşkatma mərasimi keçirilib. “Muğam aləmi” II Beynəlxalq muğam festivalı çərçivəsində keçirilən bu müsabiqədə Azərbaycan, Türkiyə Özbəkistan, Çin, Hindistan, İordaniya, İran, Küveyt və Mərakeş musiqiçiləri iştirak ediblər.

Məlumat verilib ki, II beynəlxalq muğam müsabiqəsinin münsiflər heyətinə Azərbaycanın xalq artistləri Siyavuş Kərimi, Ramiz Zöhrabov, Arif Babayevlə yanaşı, YUNESKO-nun nümayəndəsi, Paris Milli Elmi Araşdırmalar Mərkəzinin professoru Jan Dürinq, türkiyəli musiqişünas, kompozitor Ozan Yarman, amerikalı alim Uilyam Samts və iranlı bəstəkar, musiqişünas Shsan Xezrlou daxildir. Azərbaycanı festivalda 5 ifaçı – Fərqanə Qasımova, Babək Niftəliyev, Aytən Məhərrəmova, Ehtiram Hüseynov və Nişanə Baxışova təmsil edir. Daha sonra püşkatma mərasimi keçirilib. Azərbaycanda keçirilən beynəlxalq muğam müsabiqəsində ilk çıxış Özbəkistan musiqiçilərinə nəsib olub.

Qeyd edək ki, müsabiqənin birinci günündə ölkəmizi iki ifaçı təmsil edəcək, ümumilikdə isə 6 musiqiçi dinləniləcək. Muğam ifaçılarının beynəlxalq müsabiqəsi martın 20-dək davam edəcək. “Muğam aləmi” II Beynəlxalq Muğam Festivalı çərçivəsində Azərbaycan Dövlət Akademik Opera və Balet Teatrının səhnəsində Üzeyir Hacıbəylinin “Leyli və Məcnun” operası yeni quruluşda nümayiş etdirilib.

APA-nın məlumatına görə, tamaşanın quruluşçu rejissoru Hafiz Quliyev, musiqi rəhbəri və dirijoru Cavanşir Cəfərov, quruluşçu rəssamı Rafiz İsmayılovdur. Leyli rolunu xalq artisti Nəzakət Teymurova, Məcnun rolunu xalq artisti Mənsum İbrahimov ifa edib. Operanı paytaxt sakinləri ilə yanaşı, beynəlxalq festivalın iştirakçıları da maraqla izləyiblər. Festival çərçivəsində Heydər Əliyev Sarayında “Muğam-latinos” konserti keçirilib. Beynəlxalq Muğam Mərkəzində isə Azərbaycan və İraq xanəndələrinin iştirakı ilə konsert olub. Konsertdə əməkdar artist Zabit Nəbizadə “Rast” muğamını ifa edib. Sonra tamaşaçılar iraqlı muğam ustası Hüseyn Əl Ədhəmin “İraqi-maqam” kompozisiyasını dinləyibər.

Qeyd edək ki, Beynəlxalq Muğam Festivalı Heydər Əliyev Fondu, Mədəniyyət və Turizm Nazirliyi və Bəstəkarlar İttifaqının birgə təşkilatçılığı keçirilir.

525-ci qəzet.- 2011.- 18 mart.- S.7.