Xalça Muzeyində “Bahar bayramı, sənət meydanı”

Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyində Novruz bayramı münasibəti ilə peşəkar və həvəskar rəssamların, xalq yaradıcılığı ilə məşğul olan sənətkarların əl işlərindən ibarət “Bahar bayramı, sənət meydanı” adlı sərginin açılışı keçirilib. APA-nın məlumatına görə, muzeyin direktoru Röya Tağıyeva deyib ki, sərgidə nümayiş olunan əsərlər tətbiqi sənətin müxtəlif növlərində – qobelen, bədii tikmə, xalça və xalça məmulatları, kiçik heykəllər, bəzək əşyaları, metal işləmələr, muncuq, daş və digər materiallardan hazırlanıb. Bu gün sənətsevərlərin ixtiyarına verilən sərgidə F.Tağıyeva, T.Zeynalova, Ş.Əsgərova, F.Xəlilova, H.Vəkilova, S.Hacıyeva, B.Əliyeva, C.Ramazanova, N.Hüseynovun və digərlərinin yaratdığı əsərlər nümayiş olunub. Muzeydə növbəti tədbir “Açdı çiçək, gəldi yaz” adı altında keçirilib. Tədbirin keçirilməsində məqsəd Novruz sevincini ziyarətçilərlə bölüşmək, qədim bayramla bağlı adət-ənənələri gənc nəslə aşılayıb sevdirmək, onu yaşatmaqdır. Bayram tədbirində balaca tamaşaçılara muzeyin uşaq teatrının ifasında “Qırmızı papaq” və “Tıq-tıq xanım” nağılı göstərilib. Daha sonra Bülbül adına orta ixtisas musiqi məktəbinin nəzdində fəaliyyət göstərən muğam üçlüyünün ifasında xalq mahnıları və 189 saylı orta məktəbin “Təbəssüm” uşaq rəqs kollektivinin ifasında milli rəqslər təqdim olunub.

525-ci qəzet.- 2011.- 18 mart.- S.7.