İTV yenə fərqləndi

Ağdam rayonu ərazisində – qoşunların təmas xəttində 9 yaşlı Fariz Bədəlovun erməni snayperi tərəfindən qətlə yetrilməsi son günlərdə Azərbaycan kütləvi informasiya vasitələrinin aparıcı mövzusuna çevrilib. Bu, tamamilə təbiidir. Çünki düşmən snayperi bu dəfə hədəf kimi Azərbaycan əsgərini, zabitini, yaşlı dinc sakinini yox, 9 yaşlı körpəni seçib. Bu, böyük ağrıdır, böyük dərddir. Övlad ölümü bir ana üçün, bir ata üçün böyük dərddir. Amma belə ölüm bütün kəndin, bütün elin faciəsinə çevrilir. İndiki halda isə bu faciə bütün Azərbaycanın faciəsinə çevrilib. Amma övlad itirən ana üçün bu faciə... Ana üçün bir təsəlli var ki, indi bu mövzu Avropa Şurasında da aparıcı mövzuya çevrilib. İndi Farizin faciəsindən Avropa Parlamentində də xəbər tutublar. Avropa parlamenti erməni faşizmi barədə daha bir informasiya alıb. Şübhəsiz, bu işdə ölkəmizin kütləvi informasiya vasitələrinin, xüsusən televiziya kanallarının xidməti xüsusi vurğulanmalıdır.

İctimai Televiziyanın bu məsələyə ilk gündən xüsusi önəm verməsi diqqətdən yayınmadı. Fariz Bədəlovun qətlə yetirildiyi günün səhəri – martın 9-da bu kanalın xəbərlərinin əsas buraxılışında – axşam xəbərlərində geniş şərhlərin verilməsi, millət vəkillərinin, sıravi vətəndaşların bu fakta etirazının, hətta ATƏT-in Rusiyalı həmsədrinin reaksiyasının tamaşaçıların diqqətinə çatdırılması bu faciənin ictimailəşdirilməsinə, beynəlxalq səviyyədə müzakirəsinə geniş imkan açdı. Bu məsələdə İctimai Televiziya birinci oldu. Sözünü birinci dedi və sanballı dedi. Bununla da İctimai Televiziya birinci kanal adına layiq olduğunu sübut etdi. Ümumiyyətlə, İctimai Televiziya vətənpərvərlik mövzusuna həmişə xüsusi diqqətlə, xüsusi qayğı ilə yanaşıb.

Xatirimdədir ki, ötən ilin yayında Mübariz İbrahimovun qəhrəmanlığı barədə xəbər yayılan kimi bütün kütləvi informasiya vasitələrinin diqqəti bu mövzuya yönəldi. Hər kəs öz imkanı daxilində bu qəhrəmanlığa, bu qəhrəmanın taleyinə öz sevgi və ehtiramını bir cür izhar elədi. Milli Qəhrəman haqqında sənədli film çəkiləcəyi barədə anonslar yayıldı. Amma İctimai Televiziya Milli Qəhrəmana münasibətini anonssuz, reklamsız ortaya qoydu. Mübariz İbrahimov haqqında klip çəkdirdi. İstedadlı bəstəkarımız Faiq Sücəddinovla Baba Vəziroğlu məhz İctimai Televiziyanın sifarişi əsasında gözəl bir sənət əsəri ortaya qoydular. Özü də gözəl bir klip formasında. Mübariz İbrahimovun döyüş yoluna həsr olunmuş “Mübariz” adlı ilk sənədli film də İctimai Televiziyanın efirində göründü. Çünki televiziyanın rəhbərliyi hadisədən dərhal sonra xüsusi çəkiliş qrupu yaradaraq onları Mübarizin döyüşdüyü hərbi hissəyə göndərmiş, qısa zaman kəsiyində Mübariz haqqında sənədli film çəkmək tapşırığı vermişdi.

Qrup bu tapşırığın öhdəsindən də layiqincə gəldi və həm klip, həm də sənədli film eyni gündə tamaşaçılara təqdim olundu. Bütün bunlar onu deməyə əsas verir ki, İctimai Televiziya üçün vətənpərvərlik mövzusu, Vətən mövzusu birincidir! Elə ona görə də İctimai TV Azərbaycanda birincidir! Birinci kanal kimi....

BƏXTİYAR

525-ci qəzet.- 2011.- 18 mart.- S.7.