M.S.Ordubadinin xatirə-muzeyində Bahar bayramı qeyd olunub

Bahar bayramı qeyd olunub Məmməd Səid Ordubadinin xatirə-muzeyində görkəmli nasir, şair, dramaturq, tərcüməçinin 139 illik yubileyi və Bahar bayramı münasibətilə tədbir keçirilib. Tədbiri giriş sözü ilə muzeyin direktoru Lalə Abaszadə açaraq, iştirakçıları salamlayıb. M.S.Ordubadinin həyat və yaradıcılığından, Azərbaycan ədəbiyyatına verdiyi töhfələrdən, mədəniyyətimizdəki özünəməxsus yerindən danışıb. Yubileylə əlaqədar nasirin yaxın qohumları da tədbirdə iştirak ediblər. M.S.Ordubadi irsinin tədqiqatçısı Arzu Hüseynova çıxış edərək, görkəmli dramaturqun irsinin unudulmaq təhlükəsi ilə üz-üzə qaldığını bildirərək, məktəblərdə daha az tədris olunduğunu diqqətə çatdırıb. Şairə Zərəngiz Qayalı M.S.Ordubadinin şeir yaradıcılığı haqqında ətraflı məlumat verib, daha sonra özünün qələmə aldığı “Novruz” şeirini səsləndirib. Muzeyin bələdçi Laçın Mehdiyeva nasirin ev muzeyi haqda geniş məlumat verib.

Tədbirdə həmçinin, Bülbülün ev-muzeyinin direktoru Ədilə Məmmədova, M.S.Ordubadinin qohumları, qardaşı qızı Nəzifə Məmmədova, Həqiqət Məmmədova, Orxan Qəmbərov fikirlərini, xatirələrini dilə gətiriblər, ədibin gələn il tamam olacaq 140 illiyinin keçirilməsi haqqında müzakirələr aparılıb.

HÜSNİYYƏ

525-ci qəzet.- 2011.- 29 mart.- S.7.