“Özbəkistan bədii sənətkarlığı: ənənələr və müasirlik” sərgisi açılıb

Ötən gün Mədəniyyət və Turizm Nazirliyinin Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyində yeni fəaliyyətə başlayan “Azərbaycan xalçaçıları” İctimai Birliyinin (AXİB) təqdimetmə mərasimi və “Özbəkistan bədii sənətkarlığı: ənənələr və müasirlik” adlı sərgi gerçəkləşib. Tədbiri giriş sözü ilə açan filologiya elmləri doktoru, professor, əməkdar elm xadimi, Milli Məclisin Mədəniyyət komitəsinin sədri Nizami Cəfərov ölkəmizin qonşu ölkələrlə, xüsusən də türkdilli dövlətlərlə mədəni, siyasi, iqtisadi əlaqələrini dilə gətirərək bu gün həmin əlaqələr inkişaf edərək yüksək səviyyəyə çatdığını bildirib. N.Cəfərov “Azərbaycan xalçaları” İctimai Birliyinin yaradılma məqsədlərini də dilə gətirib: “2009-cu ildə təsis edilmiş və 2010-cu ildən fəaliyyətə başlamış “Azərbaycan xalçaları” İctimai Birliyi Azərbaycan xalqının milli xalçaçılıq ənənələrinin qorunub saxlanması, inkişafı, tanınmış incəsənət xadimlərinin yaradıcılıq potensialının birləşdirilməsi, istedadlı uşaq və gənclərin dəstəklənməsi məqsədilə yaradılıb. Xalçaçılıq sahəsində fəaliyyət göstərən peşəkar qurum kimi Birliyin əsas məqsədlərindən biri də, Azərbaycan xalçaçılarının yerli və beynəlxalq təşkilatlarla əməkdaşlıq etməsinə, onların peşəkarlığının artırılmasına dəstək verməkdən ibarətdir. Bu məqsədlə Birlik müxtəlif kurslar, seminarlar, dəyirmi masalar və digər mədəni-kütləvi tədbirlər təşkil edir. Birlik öz işlərini müxtəlif sərgilərdə nümayiş etdirir”.

N.Cəfərov Azərbaycanda “Xalçaçılıq haqqında” qanunun qəbulunun ölkənin xalça sənətinə verdiyi dəyərin əsas göstəricisi olduğunu bildirib. Muzeyin direktoru Röya Tağıyeva bu cür sərgilərin iki qonşu ölkə arasında mədəni münasibətlərin inkişafına təkan verəcəyinə əminliyini bildirib.

“Özbəkistan bədii sənətkarlığı: ənənələr və müasirlik” adlı sərgidə Özbəkistan mədəniyyətinin toxuculuq, bədii-tikmə, keramika, ağac üzərində oyma, milli geyim, zərgərlik və digər sənət nümunələri nümayiş etdirilib.

Qeyd edək ki, geniş tamaşaçı kütləsinə təqdim olunan “Özbəkistan bədii sənətkarlığı: ənənələr və müasirlik” adlı sərgi AXİB-nin, Özbəkistan Mədəniyyəti və İncəsənəti Fondu forumunun və Özbəkistanın “Meros” Əntiq Əşyalar Assosiasiyasının birgə səylərinin nəticəsidir.

HÜSNİYYƏ

525-ci qəzet.- 2011.- 30 mart.- S.7.