“Azərbaycan”ın daha bir sayı işıq üzü görüb

“Azərbaycan” jurnalının oxuculara təqdim olunan növbəti sayının “Poeziya” bölməsinə Rəsmiyyə Sabirin, Valeh Bahaduroğlunun, Mirsəyyaf Zamanlının, Sabir Şirvanlının, Mirhafiz Bahadırlının, Zeynal Vəfanın və Mətləb Misirin şeirləri daxil edilib. “Nəsr” guşəsində Aslan Quliyevin “Yaşıl təpələrin üstündəki buludlar” romanından bir hissə, Novruz Nəcəfoğlunun “Çarəsiz yolçu” povesti, Gülşən Lətifxanın “Ən gözəl uçuş: Kaxa” və Səfər Kəlbixanlının “Bəxtəvər ölüm” hekayələri verilib. Topluda xalq şairi Nəriman Həsənzadənin 80 illik yubileyi münasibətilə Vaqif Yusiflinin “Şeirimizin Nərimanı” və Südabə Ağabalayevanın “Məni bayraq kimi tutun yuxarı” başlıqlı məqalələri dərc olunub. Jurnalın “Xatirələr, duyğular” guşəsində Sevda Əlibəyli “Gözləyin məni” başlıqlı yazısında şair Şəkər Aslanı xatırlayıb. “Publisistika” bölməsində bu dəfə Sadıq Elcanlının qədim Azərbaycan şəhərlərindən olan Şabranın 2300 yaşı münasibətilə qələmə aldığı “Şabrandan Şabrana” başlıqlı məqaləsi yer alıb. Toplunun “Tənqid və ədəbiyyatşünaslıq” guşəsində isə Qorxmaz Quliyevin “Mən bir uşaq, sən bir ana” və Leyla Məmmədovanın “M.F.Axundzadənin həyatından bəzi məqamlar” başlıqlı yazılar işıq üzü görüb. “Söz xəzinəmizdən” rubrikasında Əlyazmalar İnstitutunun yeni nəşrləri barədə məlumatlar Paşa Əlioğlunun təqdimatında verilib. Jurnalın ənənəvi “Kitab rəfi” rubrikası bu sayda da öz əksini tapıb.

GÜNEL

525-ci qəzet.- 2011.- 30 mart.- S.7.