“Şuşam mənim, incim mənim” Xalça Muzeyində

Ötən gün Lətif Kərimov adına Azərbaycan Xalçası və Xalq Tətbiqi Sənəti Dövlət muzeyində “Şuşam mənim, incim mənim” adlı tədbir gerçəkləşib. Əvvəlcə tədbir iştirakçıları Şuşa şəhidlərinin ruhunu bir dəqiqəlik sükutla yad ediblər. Daha sonra Şuşa şəhərində vaxtı ilə fəaliyyət göstərən Azərbaycan Xalçası və Xalq Tətbiqi Sənəti Dövlət Muzeyinin filialı haqqında qısa məlumat verilib. Tədbirdə Gənc Tamaşaçılar Teatrının repertuarından Qarabağ mövzusunda yeni səhnələşdirilən Vaqif Əlixanlının “Əcəl atı” tamaşasından bir parça nümayiş etdirilib. Əsər torpaqların azadlığı uğrunda şəhid olanların xatirəsinə həsr olunub. Böyüməkdə olan gənc nəsil üçün Musiqi Akademiyasının nəzdində fəaliyyət göstərən İncəsənət liseyi şagirdləri tərəfindən “Bülbül və qızıl gül” tamaşası göstərilib. Tamaşanın məzmunu Şuşa şəhərindən qaçqın düşən iki bacının taleyindən bəhs edir. Tamaşa nikbin sonluqla yekunlaşıb.

Tədbir muzeyin ekspozisiyasında keçirildiyindən oradaca şagirdlər öz təəssüratlarını rəsmlər vasitəsi ilə bölüşüb, xalçalarımızın təbliği məqsədilə tamaşaçılara qısa fasilələrlə ekskursiyalar aparılıb, Şuşa şəhərinin gözəlliklərini əks etdirən CD- diski də nümayiş etdirilib. Tədbirə bir sıra məktəblərin müəllim və şagird kollektivi iştirak ediblər.

HÜSNİYYƏ

525-ci qəzet.- 2011.- 6 may.- S.7.