Musa Yaqubun yeni kitabı – “Payıza baxıram”

Bəlkə də borcundan çıxmadım vətən, Ömür bahar deyil, bir də qayıtsın. Ölsəm də qoynunda qoy ölüm ki mən, Çürüyüm, bir ovuc torpağın artsın.

Müasir Azərbaycan poeziyasının görkəmli nümayəndəsi, şair Musa Yaqubun bu günlərdə işıq üzü görən növbəti kitabı bu misralarla başlayır.

“Payıza baxıram” adlanan kitaba şairin əsasən son illərdə yazdığı şerlər daxil edilib. “Araz” nəşriyyatında çap olunan kitabın naşiri və redaktoru yazıçı-jurnalist Əlirza Sayılov, digər redaktoru isə professor Allahverdi Eminovdur. “Payıza baxıram”ın giriş hissəsində redaktorların Musa Yaqubun milli-mənəvi və bəşəri dəyərlərdən qaynaqlanan, geniş oxucu auditoriyası tərəfindən sevilən yaradıcılığının bir sıra aspektlərini analiz edən “Ümman sakitliyi” adlı önsözü verilib. İndiki əsl kitab boşluğunu doldurmağa hesablanan “Payıza baxıram” Musa Yaqub yaradıcılığının şirəsi saymaq olar. Kitab ölkə gənclərinin əsl vətənpərvər ruhda və estetik ideallarla tərbiyə olunmasında böyük rol oynamaca qadir nəşr nümunəsidir. Bütün bunların gerçək şahidi olmaq üçün oxucular “Payıza baxıram”ı şəhərimizin kitab köşklərindən əldə edə və bununla da Musa Yaqubun poeziya dünyası ilə bir daha baş-başa qala bilərlər.

BƏXTİYAR

525-ci qəzet.- 2011.- 12 may.- S.7.