Astarada kitab bayramı baş tutub

Astarada rayon Mərkəzləşdirilmiş Kitabxana Sisteminin təşəbbüsü ilə Azərbaycan xalqının ümummilli lideri Heydər Əliyevin anadan olmasının 88-ci ildönümünə həsr edilən IV Kitab Bayramı gerçəkləşib. Mədəniyyət və Turizm Nazirliyindən verilən məlumata görə, bayramda rayon İcra Hakimiyyətinin başçısı Taleh Qaraşov, rayon ictimaiyyəti, mədəniyyət, təhsil müəssisələrinin əməkdaşları, məktəblilər iştirak ediblər. Tədbiri giriş sözülə açan T.Qaraşov Azərbaycan xalqının ümummilli lideri Heydər Əliyevin fəaliyyət yolundan, respublikada bütün sahələrdə gedən tərəqqi prosesindən danışaraq, Astara rayonunun da son dövrdə böyük inkişaf yolu keçdiyini qeyd edib. Rayon mədəniyyət və turizm şöbəsinin müdiri Şadoğlan Bayramov çıxışında Mədəniyyət və Turizm Nazirliyinin dəstəyi ilə respublikanın regionlarında keçirilən ənənəvi kitab bayramının əhəmiyyətindən söz açıb. Sonra tədbirdə rayon MKS-nin direktoru Nazim Fərəməzov kitab bayramının əhəmiyyətindən geniş söz açıb. O, kitab bayramının gənc istedadların bilik və bacarıqlarının üzə çıxmasında önəmli rolu olduğunu bildirib.

Kitab bayramında rayonun Kakalos kənd mədəniyyət evinin “Əvəsor” kollektivinin və “Nəcib Qızlar Klubu”nun üzvlərinin əl işləri, habelə Astara rayon Tarix-Diyarşünaslıq Muzeyində saxlanan maraqlı eksponatlar və rayon MKS-nin təşkil etdiyi kitab sərgiləri nümayiş olunub.

Tədbirdə maraqlı müsabiqələr, viktorinalar keçirilib, rayon məktəblərinin və Mədəniyyət Evinin rəqs kollektivləri, Uşaq Musiqi Məktəbi şagirdlərinin çıxışları maraqla qarşılanıb.

HÜSNİYYƏ

525-ci qəzet.- 2011.- 12 may.- S.7.