Uşaq xor kollektivlərinin VII respublika müsabiqəsinin yekun konserti olub

Ötən gün M.Maqomayev adına Azərbaycan Dövlət Filarmoniyasında Azərbaycan Respublikasının dövlət müstəqilliyinin bərpasının iyirminci ildönümünə həsr edilən Uşaq xor kollektivlərinin VII respublika müsabiqəsinin yekun konserti gerçəkləşib.

Azərbaycan Dövlət Xor Kapellasının bədii rəhbəri, xalq artisti Gülbacı İmanova bildirib ki, uşaq xor kollektivlərinin respublika baxış və müsabiqələrinin keçirilməsi artıq ənənəvi hal alıb: “Hər ilin aprel ayında respublikamızın bütün rayon və şəhərlərinin uşaq xor kollektivləri müsabiqəyə qatılırlar”.

Uşaq xor kollektivlərinin VII respublika müsabiqəsi cari ilin aprel ayında zonalar üzrə Bakı, Gəncə, Lənkəran, Mingəçevir, Naxçıvan, Sumqayıt, Şəki, Şirvan şəhərlərində və Ağcabədi rayonunda keçirilib. Tədbirdə respublikanın şəhər və rayonlarından 10.000 nəfərdən çox şagird iştirak edib.

Münsiflər heyətinin qərarına əsasən xormeysterlər Tatyana Yatsenko (Bakı şəhər Ş.Ələkbərova adına 20 nömrəli Uşaq Musiqi Məktəbi) Qran Pri mükafatına, Məhin Orucova (Bakı şəhər C.Hacıyev adına 3 nömrəli Uşaq Musiqi Məktəbi) və Zemfira Nurullayeva (Bakı şəhər Q.Qarayev adına 8 nömrəli Onbirillik Musiqi Məktəbi) I mükafata, Səidə Göyçayskaya (Bakı şəhər R.Behbudov adına 2 nömrəli Onbirillik Musiqi Məktəbi), Nailə Nəhmədova (Bakı şəhər 4 nömrəli Uşaq Musiqi Məktəbi) və Səbinə İbrahimova (Naxçıvan Muxtar Respublikası Ordubad şəhər Uşaq Musiqi Məktəbi) II mükafata, Teymur Cəbrayılov (Bakı şəhər R.Hacıyev adına 15 nömrəli Onbirillik Musiqi Məktəbi), Aytən Qədirova (Bakı şəhər Ə.Bədəlbəyli adına 23 nömrəli Onbirillik Musiqi Məktəbi), Vüsalə Məmmədova (Bakı şəhər M.Maqomayev adına 26 nömrəli Uşaq Musiqi Məktəbi) və Eldar Bayramov (Ağcabədi rayon Ü.Hacıbəyli adına Uşaq İncəsənət Məktəbi) III mükafata layiq görülüblər.

HÜSNİYYƏ

525-ci qəzet.- 2011.- 13 may.- S.7.