“Naxçıvan folkloru antologiyası”nın II cildi işıq üzü görüb

“Naxçıvan Muxtar Respublikasında Xalq Yaradıcılığı günlərinin keçirilməsi haqqında” 7 fevral 2009-cu il tarixli sərəncamla təsdiqlənən Tədbirlər planına əsasən hazırlanmış “Naxçıvan folkloru antologiyası”nın ikinci cildi çapdan çıxıb. Nəfis tərtibatda çap olunan yeni nəşrdə qədim və zəngin tarixə malik muxtar respublikanın bütün bölgələrindən toplanmış folklor nümunələri, eləcə də folklor xəritəsi öz əksini tapıb. AMEA Naxçıvan Bölməsi İncəsənət, Dil və Ədəbiyyat İnstitutu Folklorşünaslıq şöbəsinin müdiri, filologiya elmlər doktoru, professor Məhərrəm Cəfərlinin, Folklorşünaslıq şöbəsinin böyük elmi işçisi, fəlsəfə doktoru Rafiq Babayevin və Folklorşünaslıq şöbəsinin baş elmi işçisi, filologiya elmlər doktoru Yusif Səfərovun tərtib etdikləri yeni nəşrdə “Miflər”, “Mif obrazları”, “İnanclar, sınamalar, yasaqlar”, ”Əfsanələr, rəvayətlər”, eləcə də bir çox maraqlı şifahi xalq ədəbiyyatı nümunələri toplanılıb. 488 səhifədən ibarət olan kitabda mərasimlər, oyunlar, pirlər, ocaqlar, yuxuyozmalar, ovsunlar, alqışlar, qarqışlar, nağıllar, xalq hikmətləri, atalar sözü və məsəllər, lətifələr, deyimlər, əmək nəğmələri, laylalar, oxşamalar, bayatılar, dastanlar, mahnılar və digər folklor nümunələrimiz yer alıb. Bölgələrimizdə yayılmış tükəçarə-xalq təbabəti, folklor mətinlərindəki adlar, dialektoloji sözlük, həmçinin toplayıcılar və söyləyicilər haqqında da antologiyanın sonunda ətraflı məlumat verilib.

525-ci qəzet.- 2011.-20 may.- S.7.