“Biz teatrı sevirik”

Azərbaycan Dövlət Gənc Tamaşaçılar Teatrında “Biz teatrı sevirik” adlı tədbir gerçəkləşib. Giriş sözü ilə çıxış edən teatrın direktoru, əməkdar artist Mübariz Həmidov tədbirdə iştirak edənləri salamlayıb. Gənc Tamaşaçılar Teatrında təmir-bərpa işlərindən sonra həyata keçirilən layihələr haqqında ətraflı məlumat verən direktor sözügedən layihələrin gənclərin və bütün yaş hədlərini əhatə edən insanların formalaşmasındakı əhəmiyyətli mövqeyini diqqətə çatdırıb: “Bir neçə ay öncə Gənc Tamaşaçılar Teatrında Azərbaycan İctimai-Siyasi Universiteti ilə birgə gerçəkləşən “Teatr, təhsil və mənəviyyatımız” layihəsinin əsas məqsədi teatra geniş tamaşaçı kütləsinin marağının artırmaq və gənc nəsli teatr müəssisələrinə cəlb etmək idi. Layihənin müsbət nəticəsi kimi bu gün teatrımızda nümayiş etdirilən tamaşalar geniş izləyici auditoriyasının maraq dairəsini əhatə edir. “Biz teatrı sevirik” adlı tədbirin də əsas məqsədi gənc nəslin mənəvi cəhətdən kamilləşməsi, onların dünya görüşünün formalaşmasıdır. İnanırıq ki, bu layihənin da uğurlu nəticələri tez bir zamanda öz bəhrəsini verəcək”.

M.Həmidov teatrın maraqlı yaradıcılıq yolu və bu yolda böyük uğurlara imza atmış aktyorlar haqqında da tədbir iştirakçılarına məlumat verib.

M.Həmidov çıxışının sonunda tədbirdə iştirak edən Slavyan Universitetinin dosenti Svetlana Teymurlu və həmin təhsil ocağının müəllimi Salatın Əhmədliyə, Azərbaycan Dillər Universitetinin dosenti Məhəmməd Teymurluya, professor Rəfiqə Əhmədovaya və başqa şəxslərə teatrın ictimai həyatında və ayrı-ayrı layihələrin gerçəkləşməsində fəal iştiraklarına görə minnətdarlığını bildirib. Azərbaycan Siyasi İctimai Universitetinin rektoru, iqtisad elmləri doktoru Rasim Nəbiyev Gənc Tamaşaçılar Teatrının gənclərin mənəvi aləminin zənginləşməsindəki rolundan danışaraq, repertuarda gənclərin tərbiyəsi məsələsinin hər zaman aktual olduğunu bildirib. Maştağa qəsəbəsinin 1№-li xüsusi məktəbinin şagirdi Səbinə Səmədova “Biz teatrı sevirik” mövzulu çıxışında gənc nəslin nümayəndəsi kimi teatrın rəhbərliyinə, onlara göstərdikləri hərtərəfli diqqət və qayğıya görə dərin minnətdarlığını ifadə edib.

Çıxışlardan sonra xalq şairi Rəsul Rzanın, məzmununda xeyirxahlıq, mehribanlıq, qayğı kimi hisslərin təbliği geniş yer tutan “Ana qaz” tamaşası oynanılıb. Səhnə tərtibatı, işıq effektləri, aktyor oyunu və ümumilikdə hər bir detal tamaşanın uğurlu alınmasına rəvac verib, səhnə işi maraqla qarşılanıb.

HÜSNİYYƏ

525-ci qəzet.- 2011.- 24 may.- S.7.