Göyçayda Rəsul Rza Mükafatının təqdimetmə mərasimi olub

Mayın 21-də Beynəlxalq Rəsul Rza Mükafatının təqdim edilməsilə bağlı xalq şairinin anadan olduğu Göyçayda tədbir keçirilib. Rəsul Rza Muzeyində təşkil edilən tədbir əsl poeziya bayramı kimi gerçəkləşib. Rayon ziyalıları, ictimaiyyət nümayəndələri, Bakıdan və başqa bölgələrdən tədbirə qatılan söz, sənət adamları Rəsul Rza sözünün işığında bir araya gəliblər. Əvvəlcə R.Rzanın abidəsi ziyarət edilib. Laureatları təbrik edən Beynəlxalq Rəsul Rza Fondunun sədri xalq şairi Fikrət Qoca bu tədbirlərin xoş bir ənənə halını aldığını, davamlı olaraq hər il keçirildiyini məmnunluqla vurğulayıb. Qeyd edək ki, bu dəfə Rəsul Rza mükafatına görkəmli tarixçi, AMEA-nın müxbir üzvü Oqtay Əfəndiyev, kinorejissor, xalq artisti Ramiz Həsənoğlu, AYB-nin sədr müavini Nazim İbrahimov, tənqidçi-publisist Bəsti Əlibəyli, yazıçılar Ənvər Seyidov və Əlibala Məhərrəmzadə layiq görülüblər.

525-ci qəzet.- 2011.- 25 may.- S.7.