Aşıq Ələsgərin 190 illiyi Moskvada qeyd edilib

Mayın19-da Moskvadakı Millətlər Evinin böyük zalında ustad Aşıq Ələsgərin anadan olmasının 190 illiyilə bağlı təntənəli tədbir keçirilib. Yubiley tədbiri “Ocaq” Azərbaycan Mədəniyyəti Cəmiyyətinin, Azərbaycan Yazıçılar Birliyinin Moskva bölməsinin, “Şəhriyar” ədəbi-mədəni cəmiyyətinin birgə təşəbbüsüylə təşkil olunub. Tədbiri giriş sözülə AYB Moskva bölməsinin sədri, filologiya elmləri doktoru, professor Tofiq Məlikli açıb. O, Aşıq Ələsgərin zəngin yaradıcılığından danışıb, ustad aşığın ölməz sənətindən, xalq ədəbiyyatımızın inkişafındakı misilsiz rolundan bəhs edib. Aşıq Ələsgərin Azərbaycan aşıq sənəti, milli aşıq poeziyası tarixində şərəfli yer tutduğunu, dahi sənətkarlarımızdan biri olduğunu, aşıq şeirinin, demək olar ki, bütün formalarında və mənaca gözəl əsərlər yaratdığını, xalq şeirimizin ən uca zirvələrini fəth etdiyini vurğulayıb.

AYB-nin Moskva bölməsinin katibi Nəsib Nəbioğlu Aşıq Ələsgərin həyatının çətin məqamlarından, aşığın uğursuz məhəbbətindən, Kəlbəcərlə bağlı yaddaşlara hopmuş xatirələrindən söz açıb. Dədə Qorqud, Qurbani, Qaracaoğlan, Yunus Əmrə, Sarı Aşıq, Aşıq Alı kimi sənətkarlarımızın yaratdığı ölməz irsi Dədə Ələsgərin uca zirvəyə qaldıraraq, şirinliyi, müdrikliyi, səmimiyyətilə əbədi poeziya meydana gətirdiyini bildirib. Nəsib Nəbioğlu deyib ki, Aşıq Ələsgər öz şeirlərində xalqımızın həyatını, tanıdığı insanların taleyini, onların sevinc və kədərini müdrikcəsinə ifadə edib. Onun fikrincə, Aşıq Ələsgər öz yaradıcılığıyla heç kəsi təkrar etməyib, hamını heyrətdə qoyacaq dərəcədə gözəl sənət nümunələri yaradıb. Nəsib Nəbioğlu Aşıq Ələsgərin də hüsnünə şeir qoşduğu Kəlbəcər gözəllərindən söz salıb, aşığın ömrünün müəyyən bir hissəsinin Kəlbəcərdə keçdiyini qeyd edib. Onun bənzərsiz yaradıcılığının yalnız şifahi ədəbiyyatımızın yox, yazılı söz sənətimizin inkişafına da böyük təkan verdiyini vurğulayıb, şeirlərindən nümunələri əzbər söyləyib. Tədbirdə Millətlər Evinin milli təşkilatlarla iş üzrə şöbəsinin rəhbəri Anatoli Kasonis, “Şəhriyar” Cəmiyyətinin sədri Vasif Məmmədli, jurnalist Cəfər Sadıq, şair İlham Bədəlbəyli, jurnalist Əliş Əvəz, islamşünas Qasım Kərimov da çıxış ediblər. Aşıq Rəhim Allahverdiyev Dədə Ələsgərin şeirlərindən oxuyub, Abbas Ağdabanlı sazda ”Yanıq Kərəmi”, Orxan Əliyev “Baş Sarıtel” havalarını səsləndiriblər. Müğənnilər Səxavət Qurbanov, Əhməd Cəbraylıov aşığın sözlərinə yazılmış mahnıları oxuyublar. Məşhur cazmen Vaqif Sadıxov fortepianoda xalq mahnıları ifa edib. Sevil İsmayılovanın rəhbərliyilə Moskvadakı etno-mədəni təhsil komponentinə malik 157 saylı məktəbin şagirdlərinin Aşıq Ələsgərin şeirləri əsasında hazırladıqları maraqlı kompozisiya alqışlarla qarşılanıb.

Tədbirin sonunda Aşıq Ələsgərin nəticəsi Nazim Qurbanov yubiley tədbirini təşkil edənlərə dərin minnətdarlığını bildirib. Mərasimdə ustad aşığın həyat və yaradıcılıq yolu barədə qısametrajlı film nümayiş olunub.

Nəbi VERDİYEV

525-ci qəzet.- 2011.- 25 may.- S.7.