“Gənc Tamaşaçılar Teatrının rəhbərliyi KİV-lə əməkdaşlığa xüsusi əhəmiyyət verir”

HÜSNİYYƏ MURSAQULİYEVA: “ÖLKƏDƏ FƏALİYYƏT GÖSTƏRƏN ƏKSƏR MEDİA ORQANLARI İLƏ SIX ƏMƏKDAŞLIQDA MƏQSƏDİMİZ TEATRIN İŞİ İLƏ ƏLAQƏLİ MƏLUMATLARIN VAXTINDA VƏ ƏTRAFLI ŞƏKİLDƏ İCTİMAİYYƏTƏ ÇATDIRILMASINA NAİL OLMAQDIR”

Azərbaycanda media ilə münasibətlərə xüsusi həssaslıqla yanaşdığı müşahidə olunan mədəniyyət kollektivlərindən biri Gənc Tamaşaçılar Teatrıdır. Bu teatrda Mətbuat Xidməti bir neçə ildir ki, davamlı fəaliyyət göstərir. Xidmətin əsas vəzifələri kütləvi informasiya vasitələri ilə sıx əməkdaşlıq edərək teatr haqqında media təmsilçilərinin bütün şifahi və yazılı suallarını müntəzəm olaraq cavablandırmaqdır. Bundan başqa teatrın fəaliyyətinə dair tədbirləri, premyeraları KİV-lər vasitəsilə ictimaiyyətə çatdırmaqdır. 2010-cu ilin sentyabr ayından Teatrın Mətbuat Xidmətinə Hüsniyyə Mursaquliyeva rəhbərlik edir. H.Mursaquliyeva Azərbaycan Dövlət Mədəniyyət və İncəsənət Universitetinin “Sənətşünaslıq” fakültəsinin teatrşünaslıq ixtisasını bitirib. Bir müddət ölkənin aparıcı mətbu orqanlarından olan “525-ci qəzet”də çalışıb.

H.Mursaquliyevanın sözlərinə görə, 84 illik zəngin tarixə malik bu mədəniyyət ocağında çalışmaq böyük məsuliyyət tələb edir: “Bu teatrda korifey sənətkarlar fəaliyyət göstəriblər.”

Gənc Tamaşaçılar Teatrı ölkəmizdə repertuar zənginliyi ilə seçilən teatrlardandır. Bu sənət ocağı mədəniyyət aləminə pioner və məktəblilərin bədii özfəaliyyət dram dərnəklərinin əsasında yaranan Bakı Uşaq Teatrı kimi qədəm qoyub. İlk dəfə teatr 1927-ci il martın 15-də pioner dəstə rəhbəri Lətif Kərimlinin quruluşunda “Fırtına” tamaşasını təqdim edərək tarixə adını yazıb. 14 yaşlı Ağadadaş Qurbanovun təşəbbüsü ilə hazırlanan bu tamaşa respublikamızda uşaq teatrının yaranmasının təməlini qoyub. 1928-ci ildə Azərbaycan Xalq Maarif Komissarlığının qərarı ilə Bakı Uşaq teatrı rəsmi olaraq fəaliyyətə başladı. Teatrın ilk aktyorları və rejissorları Ağadadaş Qurbanov, Məmmədağa Dadaşov, Yusif Əminli, Minə Abdullayeva, Yusif Dadaşov, Susanna Məcidova, Cəvahir İskəndərova, Süleyman Ələsgərov, Hüseynağa Sadıxov, Kərim Həsənov, Zəfər Nemətov, Məhərrəm Haşımov, Əliməmməd Atayev və başqaları olublar. Teatrın rus bölməsi 1928-ci il noyabr ayının 06-da Smirnov və Şerbakovun “Beş nəfər” pyesi əsasında hazırlanmış eyniadlı tamaşa ilə, Azərbaycan bölməsi isə 1930-cı il yanvar ayının 30-da İvanterin “Qırmızı qalstuk əleyhinə” adlı əsəri ilə öz fəaliyyətinə başlayıb... Beləliklə, Gənc Tamaşaçılar Teatrı 84 il ərzində daim yeniliklərə imza ataraq, maraqlı səhnə əsərləri, rəngarəng quruluşları ilə tamaşaçılarının görüşünə gəlir. Yarandığı ilk illərdən müasirliyə meyl edən və həmişə bu ənənəni yaşadan, elə bu mühüm cəhətlə də tamaşaçıları özünə cəlb edən teatrda çalışmaq olduqca məsuliyyətli və şərəflidir”.

Mətbuat xidmətinin sözlərinə görə, teatrda təşkil olunan bütün tədbir və premyeralara ölkədə fəaliyyət göstərən əksər KİV nümayəndələri dəvət edilirlər: “Gənc Tamaşaçılar Teatrında hər il bir sıra yeni premyeralar, o cümlədən mühüm əhəmiyyətli layihələr, tədbirlər həyata keçirilir. Ölkədə fəaliyyət göstərən televiziya, radio, xəbər agentlikləri, portalları və qəzetlərlə sıx əməkdaşlıq etdiyimizdən teatrla əlaqəli bütün tədbirlər mətbu orqanlar, televiziya kanalları vasitəsilə işıqlandırılır. Tədbir və tamaşa haqqında materiallar qəzet səhifələrində yayımlanır.

Teatrımız media ilə əlaqələrə böyük əhəmiyyət verir.

Əməkdaşlıq etdiyimiz bütün jurnalistlərin koordinatları bizdə var. Bir neçə gün öncədən həmin jurnalistlərlə əlaqə yaradılır, keçiriləcək tədbir, nümayiş etdiriləcək premyera haqqında onlara məlumat verilir və tədbirə dəvət edilirlər. Televiziya kanallarına isə tədbirlə bağlı fakslar göndərilir. Premyeralar zamanı jurnalistlərə tamaşanın proqramı, tədbir zamanı isə press-relizlər paylanır. Proqram və press-relizlər həm də jurnalistlərin elektron ünvanlarına göndərilir. Çalışırıq ki, üzərimizə düşən işin, vəzifəmizin öhdəsindən layiqincə gələk”.

H.Mursaquliyevanın sözlərinə görə, teatrda mətbuat xidməti şöbəsinin yaradılmasında əsas məqsəd KİV ilə müntəzəm əlaqə yaratmaq, teatr üçün əhəmiyyətli hadisələri mətbuatda daha ətraflı işıqlandırılmasını təşkil etməkdir: “İşə başladığım ilk gündən etibarən qəzetlərdə teatrımızın fəaliyyətini əks etdirən informasiyalar, teatrın direktorunun müsahibələri, açıqlamaları, aktyorların yaradıcılıqları ilə əlaqədar məqalələrin surətini çıxarıb teatrda mövcud olan “teatr və mətbuat” stendində yerləşdirirəm. Daha sonra həmin materialları xüsusi qovluqlarda toplayıram. Bu qovluqlar hər teatr mövsümünün sonunda teatrın arxivinə təhvil verilir”.

Mətbuat katibi teatrın bütün məlumatlarının KİV-lə yanaşı, sosial şəbəkələr vasitəsilə yayılmasının əhəmiyyətli olduğunu deyir: “Bəzi insanların mütəmadi olaraq qəzet və portallardakı xəbərləri gündəlik izləmək imkanları yoxdur. Nəzərə alsaq ki, günümüzdə insanların böyük əksəriyyəti Facebook istifadəçisidir və bu sosial şəbəkə paylaşmaqla özündə ən müxtəlif, lakin ən əsası, yeni xəbərləri ehtiva etdirir, onda bu şəbəkənin məlumat paylaşımında əvəzsiz xidmətləri olduğunu şahidi olarıq. Bu gün sosial şəbəkələrdən istifadə edən gənclərin sayı olduqca çoxdur. Bu gənclərin böyük əksəriyyəti də xəbərləri adıçəkilən şəbəkələrdən əldə edirlər. Bunları nəzərə alaraq mən də

teatra aid məlumatları Facebook sosial şəbəkəsindəki səhifəmizə

yerləşdirirəm.

Bununla da insanlar daha geniş informasiyaya sahiblənirlər. İnsanlar bizim səhifəmizə maraqlandıqları tamaşalar, bəyəndikləri aktyorlar haqqında suallar ünvanlayır, biz də həmin sualları cavablandırırıq. Sosial şəbəkələrin əhatə dairəsi geniş olduğundan teatrda gerçəkləşən hər hansı bir tədbir haqqında daha çox insan xəbərdar olur. Bu sosial şəbəkə həm də mənə əməkdaşlıq etdiyim qəzetlərin, agentliklərin sayını artırmaqda yardımçı olur.

Böyük dinləyici auditoriyasına malik radiolarla da məlumatlarımızın yayımlanması çox vacibdir.

Çünki televiziyanı izləmək imkanı olmayan insanların çoxu radioya qulaq asır, orada səslənən bütün xəbərləri dinləyir. Bu səbəbdən də radiolarla əməkdaşlığımı daha da genişləndirməyə çalışıram”.

H.Mursaquliyeva teatrın rəhbərinin KİV-ə münasibətini də diqqətə çatdırıb: “Gənc Tamaşaçılar Teatrının rəhbərliyi, ilk növbədə direktor, əməkdar artist Mübariz Həmidov qəzetlərlə və ümumiyyətlə KİV-lə əməkdaşlığa xüsusi əhəmiyyət verir. Məlumat üçün müraciət edən hər bir jurnalist Mübariz Həmidovdan maraqlandığı bütün suallara dolğun cavab ala bilər. Əminliklə deyə bilərəm ki, Mübariz Həmidov mətbuata tam açıq teatr rəhbərlərindəndir. Bu da jurnalistlər tərəfindən müsbət qarşılanır. Çünki jurnalistlər əksər hallarda hər hansı teatr və ya müəssisənin rəhbəri ilə danışmaq, suallarına cavab tapmaq istədikləri halda, tam əks təpki ilə rastlaşdıqlarından şikayətçi olurlar. Bizim teatra hər hansı sualla müraciət edən jurnalist Mübariz Həmidov və ya mətbuat xidməti tərəfindən məlumatlandırılır”.

H.Mursaquliyeva teatrda həyata keçirilən tədbirlər haqqında məlumat verib: “Gənc nəslin mənəvi cəhətdən kamilləşməsində, onların dünya görüşünün formalaşmasında və Vətənə məhəbbət ruhunda tərbiyə olunmasında, bədii anlamının inkişafında teatrların, xüsusilə də Azərbaycan Dövlət Gənc Tamaşaçılar Teatrının rolu əvəzsizdir. Bunu nəzərə alaraq ötən il teatr bir sıra təhsil müəssisələri ilə layihələr həyata keçirib. Bunlardan biri teatrın Azərbaycan İctimai Siyasi Universiteti ilə birgə həyata keçirdiyi “Teatr, təhsil və mənəviyyatımız” adlı tədbiridir. Tədbirin əsas mahiyyəti və məqsədi sadalanan keyfiyyətlərdir. Tədbirdə teatrın direktoru, əməkdar artist Mübariz Həmidov çıxış edərək Azərbaycan Dövlət Gənc Tamaşaçılar Teatrının zəngin tarixindən, özünəməxsus ənənələrindən, maraqlı yaradıcılıq yolundan, teatr sənətinə imzalarını atmış neçə-neçə aktyor nəslinin yetişməsində bu teatrın rolu, teatrın baş rejissoru, xalq artisti Cənnət Səlimova teatrın mənəvi və tərbiyəvi əhəmiyyəti haqqında danışaraq böyük ənənələrə malik teatrın bütün zamanlarda tərbiyəedici mövqedə olduğunu diqqətə çatdıraraq, repertuar və oynanılan əsərlərin əsasında gənclərin tərbiyə edilməsi məsələsi hər zaman aktuallığı, Azərbaycan İctimai-Siyasi Universitetin rektoru, iqtisad elmləri doktoru, professor Rasim Nəbiyev isə teatrın gənclərin təlim-tərbiyəsində əhəmiyyətindən, gənclərə teatr sevgisinin aşılanması sahəsində görülən təqdirəlayiq işlərini diqqətə çatdıraraq belə mədəniyyət ocağında müntəzəm olaraq birgə layihələrin keçirilməsinin vacibliyindən danışıblar. Teatr mövsümünün yeni açılmasına baxmayaraq, teatr bu tipli tədbirlərin həyata keçirilməsini davam edir. Təhsil ilinin başlanması münasibətilə teatr adıçəkilən universitetlə birgə layihə həyata keçirib. Azərbaycan İctimai-Siyasi Universitetinin təşəbbüsü ilə gerçəkləşən layihə gənclərin, xüsusən ali təhsil ocaqlarında təhsil alan tələbələrin teatra cəlb olunması və teatrın imkanlarından onların hərtərəfli tərbiyəsi üçün geniş istifadə olunması məqsədini daşıyıb. Tələbə adını qazanmış abituriyentləri təmirdən çıxmış teatr, onun zəngin tarixi ilə yaxından tanış etmək, tələbələrə qiymət kitabçaları və tələbə biletləri təqdim etmək keçirilən layihənin əsas qayəsini təşkil edib. Azərbaycanın müstəqilliyinin bərpasının 20-ci ildönümünə həsr olunan tədbirdə giriş sözü ilə çıxış edən universitetin rektoru Rasim Nəbiyev 20 il ərzində ölkəmizdə demokratiyanın inkişafı sayəsində böyük nailiyyətlərin əldə olunduğunu diqqətə çatdırıb. Onun sözlərinə görə, ulu öndər Heydər Əliyev ideyalarının, onun siyasi kursunun ölkə prezidenti cənab İlham Əliyev tərəfindən uğurla davam etdirilməsi bizim mədəni və mənəvi rifahımızın yaxşılaşdırılmasına yönəldilib. Tələbə adını qazanmış hər kəsi təbrik edən R.Nəbiyev tələbələrin bu məsuliyyətli adı şərəflə daşıyaraq Azərbaycanın adını hər zaman uca tutacaqlarına əminliyini dilə gətirib. Teatrın baş redaktoru, əməkdar mədəniyyət işçisi Səriyyə İsmayılova ilk dəfə olaraq tələbə biletlərinin teatr müəssisəsində təqdim olunmasının İctimai-Siyasi Universitetin müəllim heyətinin tələbələrə olan diqqət və qayğısı kimi qiymətləndirib. S.İsmayılova ölkə prezidentinin teatrlara olan diqqəti sayəsində bir sıra teatr müəssisələri, o cümlədən Gənc Tamaşaçılar Teatrının binasının yüksək səviyyədə təmir olunmasını təqdirəlayiq iş kimi yüksək dəyərləndirib. Azərbaycan İctimai Siyasi Universitetinin müəllim və professor kollektivinin iştirakı ilə keçirilən tədbirdən sonra gənclərin mənəvi-estetik tərbiyə olunmasında böyük bədii əhəmiyyətə malik iki gəncin saf, təmənnasız məhəbbətini əks etdirən dramaturq Əli Əmirlinin “Mən səni sevirəm –MSS” tamaşası nümayiş etdirilib”.

Ölkədə fəaliyyət göstərən ev muzeyləri ilə sıx əməkdaşlıq edən teatr bu sənət ocaqları ilə də bir sıra uğurlu əməkdaşlığa imza atıb. Mətbuat xidmətinin sözlərinə görə, bunlardan biri yaxınlarda görkəmli şair Səməd Vurğunun ev-muzeyi, Gənc Tamaşaçılar Teatrı və Dünya Azərbaycanlıları Mədəniyyət Mərkəzinin “Bura Vətəndir” məclisinin birgə layihəsi kimi gerçəkləşib: “Zirvədəki şəxsiyyətlər Səməd Vurğun – 105” adlı tədbirin keçirilməsində əsas məqsəd ilboyu dahi şairin yubileyi münasibətilə həyata keçirilən silsilə tədbirləri davam etdirmək, onun Azərbaycan ədəbiyyatı və poeziyasındakı mövqeyini diqqətə çatdırmaqdır. Tədbirdə Azərbaycan İctimai Siyasi Universitetinin rektoru, iqtisad elmləri doktoru, professor Rasim Nəbiyev, Səməd Vurğunun ev muzeyi və fondunun rəhbəri Aygün Vəkilova, Vurğunşünas Aslan Salmansoy, teatrın baş redaktoru, əməkdar mədəniyyət işçisi Səriyyə İsmayılova çıxışlarında hər bir azərbaycanlının tərbiyəsində, mədəniyyətində əvəzsiz mövqeyindən, şairin poeziya və dramaturgiyasından danışıblar. Tədbirdə şairin əsərlərin parçalar teatrın aktyorlarının ifasında nümayiş etdirilib”.

Məlum olub ki, rəhbərlik teatrı beynəlxalq miqyasda tanıtmağa da xüsusi diqqətlə yanaşır:

“Cari ilin noyabr ayının 3-də Gənc Tamaşaçılar Teatrında UNESCO-nun nəzdində Uşaq və Gənclər Teatrları Beynəlxalq ASSİTEJ-in Azərbaycan Milli Mərkəzinin ilk toplantısı keçirilib. Toplantını giriş sözü ilə açan ASSİTEJ-in Azərbaycan Milli Mərkəzinin sədri, Gənc Tamaşaçılar Teatrının direktoru, Əməkdar artist Mübariz Həmidov Bakıda keçirilən Beynəlxalq Kukla Teatrları Festivalı barədə ətraflı məlumat verib. Onun sözlərinə görə, Azərbaycanın müstəqilliyinin bərpasının 20 illiyinə həsr olunan Festivalda 16 ölkədən 20-dən çox kukla teatrı iştirak edir. ASSİTEJ haqqında danışan direktor Gənc Tamaşaçılar Teatrının böyük səs çoxluğu ilə UNESKO nəzdində Uşaq və Gənclər teatrları Beynəlxalq ASSİTEJ-in İcraiyyə Komitəsinin Fransada keçirilən qurultayında sözügedən qurumun üzvlüyünə qəbul edildiyini diqqətə çatdırıb: “Qurultay zamanı Gənc Tamaşaçılar Teatrı bu nüfuzlu beynəlxalq təşkilatın Azərbaycan Milli Mərkəzi elan olunub. Mərkəzin sədri isə teatrın direktoru olaraq mən seçilmişəm. Dünyanın ən nüfuzlu 85-dən çox teatr bu təşkilatın üzvüdür. Arxiv materiallarını araşdıranda öyrəndim ki, bizim teatr Sovet dönəmində 1960-cı illərdə də bu təşkilata üzv seçilib. Hətta teatrımızın əvvəlki binasında Zaqafqaziya ölkələrinin gənc tamaşaçılar teatrlarının seminarı da keçirilib”. Mərkəzin fəaliyyət proqramı haqqında ətraflı məlumat verən sədr ASSİTEJ-ə üzv seçilməklə teatrın müxtəlif beynəlxalq tədbirlər, festivallar, seminarlarda iştirakının daha geniş xarakter alacağını diqqətə çatdırıb.

ASSİTEJ-in prezidenti İvetta Hardi çıxışında təşkilatın fəaliyyəti haqqında danışaraq, qurumun əsas məqsədini diqqətə çatdırıb: “ Bizim təşkilatın əsas məqsədi dünyanın hər yerindən olan uşaqlara ən yüksək standartlara malik teatrı göstərməkdir. İnanırıq ki, bu kiçik yaşlarından teatra gedən uşaqların gələcək həyatlarında müsbət təsirini göstərəcək. Bu həm də qloballaşan dünyada insanın özünü təsdiq etməsi qədər önəmlidir. ASSİTEJ-in əsas amalı dünyanın müxtəlif ölkələrinin teatrlarında olan problemləri həll etməkdir. Bunun üçün hər il müxtəlif ölkələrdə 100-dən artıq festivallar həyata keçirilir. Azərbaycanla da bundan sonra daha sıx ünsiyyətdə olmaqla təcrübə mübadiləsi etmək hər iki tərəf üçün geniş imkanlar açacaq”.

Azərbaycan İctimai – Siyasi Universitetinin rektoru, İqtisad elmləri doktoru, professor Rasim Nəbiyev ölkəmizin nüfuzlu təşkilata üzv seçilməsini təqdirəlayiq hal kimi qiymətləndirib. Xalq artisti Ağaxan Salmanlı, sənətşünaslıq elmləri namizədi Aydın Talıbzadə, Alman –Azərbaycan cəmiyyətinin sədri, Bakı Slavyan Universitetinin professoru Çingiz Abdullayev, Bakı Uşaq Teatrının nümayəndəsi Arzu Soltan və başqaları çıxış edərək ASSİTEJ-ə üzv seçilməklə teatrın dünya arenasına çıxışının daha geniş xarakter alacağını diqqətə çatdırıblar”.

Sevinc QARAYEVA

525-ci qəzet.- 2011.- 17 noyabr.- S.6.