“Xalq cəbhəsi” qəzetinin 10 yaşı tamam olur

ELÇİN MİRZƏBƏYLİ: “GÜNEY AZƏRBAYCANA DİQQƏTİN BİZİM ÖLKƏ MEDİASINDA OYADILMASINDA “XALQ CƏBHƏSİ” QƏZETİNİN XİDMƏTLƏRİ MÜSTƏSNADIR”

Bu gün Azərbaycan mətbuatında öz dəsti-xətti ilə seçilən “Xalq cəbhəsi” qəzetinin 10 yaşı tamam olur. Bununla əlaqədar qəzetin baş redaktoru Elçin Mirzəbəyli “525”in suallarını cavablandırıb

– Ötən 10 il müddətində ən çox yadda qalan hadisə nə olub?

– 8-ci mikrorayonda yerləşdiyimiz binanın 13-cü mərtəbəsinin daha çox hadisə baş verib. Oradakı şəraitimiz o qədər bərbad vəziyyətdə idi ki, ümumiyyətlə hər hansı mətbuat orqanının həmin şəraitdə işləməsi ağlasığmaz idi. Məndən öncə qəzetin baş redaktoru olmuş şəxslər və əməkdaşlar da bu problemlərlə qarşılaşıblar. Orada adətən işıqlar tez-tez sönürdü, lift işləmirdi və bir çox halda biz 13-cü mərtəbəyə piyada qalxıb düşməli olurduq. Elə vaxt olub ki, işıqlar sönüb və internet klublardan birinə gedib, orada işləməli olmuşuq. Bütün avadanlığı birinci mərtəbəyə düşürmüşük və ora çatanda işıqlar yanıb, yenidən geriyə qayıtmalı olmuşuq. Maraqlı hadisələr həddən artıq çoxdur. Az qala hər gün qəzetdə bir lətifə baş verir. Bütün bunları 10 il ərzində toplasan böyük bir kitab ortaya çıxardı. Ancaq həmin o, 13-cü mərtəbədə olduğumuz müddətdə ən unikal hadisə binanın rəhbərliyinin kanalizasiya xətlərini kəsməsi olub. O zaman 13-cü mərtəbədən 1-ci mərtəbəyə daha tez-tez düşmək məcburiyyətində qalırdıq. Uşaqlarımız da az qala idmançıya çevrilmişdilər, hər biri atletik görkəm almışdı. İndi həmin problemlərlə qarşılaşmırıq, bugünkü şəraitimiz o vaxtkı ilə müqayisə edilməz dərəcədədir. Ancaq həmin acı xatirələri hər dəfə xatırlayanda bir üzümüzdə təbəssüm yaranır.

– Ölkədə xeyli sayda qəzet var . Ötən 10 ildə “Xalq cəbhəsi” qəzeti özünün yerini müəyyən edə bildimi?

– “Xalq cəbhəsi” özünün yerini tapması üçün heç 10 il əziyyət çəkmədi. Qəzet fəaliyyətə başladıqdan bir neçə ay sonra öz prinsipləri, dəsti-xətti ilə artıq yerini tapmışdı. Bu gün Azərbaycan mətbuatında çox sayda gündəlik qəzet fəaliyyət göstərir və onların həm oxşar, həm də fərqli cəhətləri var. Təbii ki, ümumi yanaşmalarda “Xalq cəbhəsi” qəzeti ilə bir sıra qəzetlərlə, o cümlədən “525-ci qəzet”lə oxşar cəhətləri var. Amma biz ilk gündən elan etdiyimiz hədəflərlə, prinsiplərlə bugünkü fəaliyyətimiz arasında heç bir fərq yoxdur. Öz prinsiplərimizə ardıcıl şəkildə əməl etmişik. Milli azadlıq hərəkatının dalğası yarananda, söhbət siyasi proseslərdən getmir, sırf xalq hərəkatı kimi formalaşanda onun təməl prinsipləri var idi. Bunlar Azərbaycanın ərazi bütövlüyünün təmin olunması və Dağlıq Qarabağ üzərində dövlətimizin suveren hüqüqlarının bərpası, Azərbaycan milli şüurunun oyadılması, bu istiqamətdə təbliğatın aparılması, türkçülük və azərbaycançılıq xətti idi. Qəzetimiz fəaliyyətdə olduğu müddətdə bütün bu prinsiplərlə işini qurub və bir an da olsun bunlardan kənarlaşmayıb. Bu baxımdan bir çox məsələ, o cümlədən Güney Azərbaycanla bağlı məlumatlar əsasən “Xalq cəbhəsi” qəzetində yayılır. Güney Azərbaycana diqqətin bizim ölkə mediasında oyadılmasında “Xalq cəbhəsi” qəzetinin xidmətləri müstəsnadır. Heç kimin diqqət yetirmədiyi vaxtlarda biz bu işlə məşğul olmuşuq və bu gündə həmin vəzifəni şərəflə yerinə yetiririk. Çoxlu sayda fərqli cəhətlərimiz var və bu hadisələrə yanaşmamızda özünü göstərir. Qəzetimizin özünəməxsus cəhətlərini hər kəs qeyd edə bilər. Ola bilsin kiminsə bundan xoşu gəlmir, kimsə qəbul etməsin, amma bu bizik, necə varıq elə.

– Yəqin ki, bu gün yazılı medianını üzləşdiyi problemlər sizdən də yan keçməyib.

– Biz elə problemlər yaşamışıq ki, bu gün onları heç kimə arzulamıram. Əvvəl qeyd etdiyim 13-cü mərtəbədə qışın soyuğunda otaqda az qala kürklə oturduğum bir vaxtda işıqlar sönəndə generatorun gücü ancaq kompüterlərin işlədilməsinə çatırdı. Masamın üzərindəki çırağı gözümün qarşısında bu günədək saxlayıram ki, həmin günləri unutmayım. Problemlər hər zaman olacaq, bunlarla yanaşı, yaşamağı bacarmaq lazımdır. Çünki hər dəfə yeni bir problem çıxır, cəmiyyət, media inkişaf edir, yeni dövrə uyğunlaşmalısan və bunun üçün yeni imkanlar lazımdır. Bunları əldə etmək üçün maliyyə və digər texniki imkanlar olmalıdır. Bu hər bir gündəlik mətbu orqanının qarşılaşdığı problemlərdir. Biz problemləri tədricən aradan qaldırmağa çalışırıq. Əsas faktor qəzetin qorunub saxlanmasıdır. Belə deyək ki, mətbuatın ümumi inkişafı fonunda qəzetin inkişafına nail olmaqdır ki, bu da bizim üçün prioritet təşkil edir.

– Vaxtı ilə qəzetə rəhbərlik edən və eyni zamanda əməkdaşları olmuş jurnalistləri təşkil etdiyiniz mərasimə dəvət etmisinizmi?

– Geniş şəkildə tədbirimiz olacaq və keçmiş əməkdaşlarımızın böyük bir qismini dəvət etmişik. Bizim konkret sayda insanlar dəvət etmək imkanımız var idi və buna uyğun həmkarlarımızı dəvətlər göndərdik. Qəzetin ilk baş redaktoru olmuş Vüsalə Mahirqızı daxil olmaqla, digər baş redaktor olmuş şəxslər, eləcə də jurnalistlərimiz burada iştirak edəcək.

–Gələcək zaman ərzində qəzetlərin kağız variantdan internetə keçidinin olacağı qeyd edilir. Sizin qəzet buna hazırdırmı?

– Özümə və digər mətbu orqanların rəhbərlərin təsəlli olaraq bildirmək istəmirəm. Amma qeyd edim ki, bu gün Azərbaycanda internet bumu yaşanır, yeni media və sosial şəbəkələr daha çox dəbdədir, diqqət çəkir. Ölkədə bir çox insanlar kompüter almaqla sosial şəbəkələrə çıxışlarını təmin edirlər. Bu yeni ünsiyyətin, dialoqun formasıdır. Amma internet media vasitəsi deyil, kommunikasiya vasitəsidir və ona görə də internet heç zaman qəzeti əvəz etməyəcək. Necə ki, internet televiziyanı, televiziya qəzeti, kino teatrı əvəz edə bilmədi. Hər bir şeyin öz yeri var. Ola bilər zamanla yeni çıxan texnologiya öz dəb dövrünü yaşayır, zaman keçdikcə bu prosesin özü tənzimlənir. Hesab edirəm ki, çap mediası yeni texnologiyalardan istifadə etməklə, özünün varlığını qoruyub saxlayacaq. Azərbaycanda istər internet mediası, istərsə də çap mediası üçün əsas problem bu deyil. Ən böyük problem oxucu mədəniyyətinin olmamasıdır, azərbaycanlılar oxumağı sevmirlər. Oxumaq bizim mədəni həyatımızın tərkib hissəsinə çevrilməyib, mütaliə etməyi əksəriyyətimiz xoşlamırıq. Hesab edirəm ki, bu problemi aradan qaldırmaq lazımdır.

– Özünüz özünüzə nə arzu edərdiniz?

– İstər qəzetimizin əməkdaşları, istər redaktorlarının hər biri yüksək yaşam tərzinə, mükafatlara layiqdirlər. Arzu edərdim tək bizim qəzetin fədakar redaktorları, jurnalistləri yox, bütövlükdə Azərbaycan mətbuatının ləyaqətli jurnalistləri, öz imzalarına hörmət edən mətbuat nümayəndələri layiq olduqları həyat tərzini yaşaya bilsinlər. Çünki hər şey burdan başlayır. İnsan layiq olduğu qiyməti alanda o xoşbəxt olur, gələcəyə ümidlə baxır, peşəsinə daha çox bağlanır.

Bəxtiyar MƏMMƏDLİ

525-ci qəzet.- 2011.- 19 noyabr.- S.7.