Qənirə Paşayeva “Onun sevgi məktubları”nı imzalayıb

Noyabrın 19-da millət vəkili Qənirə Paşayevanın “Onun sevgi məktubları” adlı yeni kitabının təqdimat mərasimi keçirilib. Park Bulvar-da “Əli və Nino” kitab dükanları şəbəkəsinin satış məntəqəsindəki mərasimdə Qənirə Paşayeva bunu özü üçün önəmli bir hadisə hesab edib. O bildirib ki, bu kitabın təqdimatı xeyriyyə aksiyası üçün nəzərdə tutulub.

Tədbirdə “Əli və Nino” kitab dükanları şəbəkəsinin sahibi Nigar Köçərli, kitabın redaktoru Günel Mövlid, Milli Məclisin deputatı Jalə Əliyeva və başqaları Q.Paşayevanı təbrik edərək, ona yeni yaradıcılıq uğurları arzulayıblar.

Q.Paşayeva deyb ki, “Onun sevgi məktubları”nın satışından əldə olunacaq gəlir bütünlüklə, həyat yoldaşını itirmiş, üç uşaq anası olan kimsəsiz və evsiz bir qadının problemlərinin həllinə sərf ediləcək. Sonra müəllif oxucular üçün kitabları imzalayıb.

“Onun Sevgi məktubları” adlı epistolyar roman Q. Paşayevanın yazdığı ilk bədii əsərdir.

“Onun sevgi məktubları” Azərbaycanın müasir ədəbiyyatında epistolyar janrda yazılmış azsaylı əsərlərdən biridir. Real hadisələr üzərində qurulmuş romanda yer alan məktubların mətni də kitabda nağıl olunan sevgi hekayəti qədər gerçəkdir. Oxuyacağınız hekayəti bədii təhkiyə və xırda müdaxilələrlə oxuculara çatdıran müəllif Qənirə Paşayeva, hadisələrin yazarı olmaqla yanaşı, həm də gerçək iştirakçılarından, qəhrəmanlarından biridir.

“Onun sevgi məktubları” – üç nəfərin hekayətidir...

Kitab müəllifin bu fikirləri ilə başlayır:

“Heç düşündünüzmü, bizə sevdiyimizi xatırlamaq, unutmamaq üçün yaddaş verən Tanrı niyə onu unutmaq üçün heç nə verməyib? Bəlkə Tanrı qullarını ən zəif, ən həssas, ən ağrılı yeri olan sevgi ilə imtahana çəkir? Sevgi ilə yaratdığının ağrıya dözümünü yoxlayır?

Sevgi, sevən insana ağrını, acını da sevdirəcək qədər dəlidi, çılğındı. Qəlbini yaralayan, könlünü, ruhunu ağrıdan, qürurunu darmadağın edən bir insana dünyanın ən gözəl sözlərini dedirdəcək qədər güclüdü. Ölümdən başqa heç nəyə tabe olmayan dəhşətli hissdir sevgi.

Amma heç nəyə baxmayaraq, sevgidən qorxmaq lazım deyil. Onu yaşayanda, elə cənnəti yaşayır insan. Bir də ki, qorx, ya qorxma, fərqi yoxdur. Qəfil qonaq kimi, ən gözləmədiyin anında gəlir sevgi...

Kimisinə cənnəti, kimisinə cəhənnəmi gətirərək...”.

525-ci qəzet.- 2011.- 22 noyabr.-S.7.