Gənc yazıçı Zərdüşt Şəfinin “Başqa adamlar” kitabının təqdimatı olub

Ötən gün Azərbaycan Yazıçılar Birliyinin “Natəvan” klubunda gənc yazıçı Zərdüşt Şəfinin “Başqa adamlar” adlı hekayələr toplusunun təqdimat mərasimi keçirilib. Azərbaycan Yazıçılar Birliyi və “Təhsil” nəşriyyatının birgə layihəsi olan “Müəllifin ilk kitabı” seriyasından ilk nəşr kimi işıq üzü görmüş “Başqa adamlar” kitabına gənc yazıçının “Başqa adamlar”, “Başqa zamanlar”, “Günlərin bir günü” bölmələri altında silsilə hekayələri, bir essesi və bir qısametrajlı film ssenarisi daxil edilib. Kitabdakı hekayələrdə əsasən insan faktoru ön plana çəkilir, hər bir insanın qəlbinin dərinliyindəki xüsusiyyətlər, xarakterlər açılır, insanı başqalaşdıran, onu digərlərindən fərqləndirən amillər qabardılaraq göz önünə gətirilir.

Kitaba Azərbaycan Yazıçılar Birliyinin katibi, “525-ci qəzet”in baş redaktoru Rəşad Məcid ön söz yazıb, nəşrin redaktoru Mustafa Çəmənli, rəssamı Gündüz Ağayevdir.

Təqdimat mərasimini Rəşad Məcid açaraq, AYB ilə Mədəniyyət və Turizm Nazirliyinin birgə layihəsi olan Gənc Ədiblər Məktəbinin məşğələlərinin, dəyərli qələm sahiblərinin gənc ədiblərlə görüşlərinin, keçirilən ustad dərslərinin onların bir yazar kimi yetişməsində əhəmiyyətli rol oynadığını qeyd edib. O, Zərdüşt Şəfinin bu Məktəbin ən fəal və istedadlı üzvlərindən biri kimi hər zaman diqqət mərkəzində olduğunu vurğulayıb: “Məktəb üzvlərindən 10-a qədər gənc var ki mən onların gələcəkdə Azərbaycan ədəbiyyatının inkişafında əhəmiyyətli rol oynayacaqlarına əminəm. Bizim gənc yazarlarla bağlı işlərimiz davam edir və həyata keçirdiyimiz bu yeni nəşr layihəsinin ilk məhsulu olan, Zərdüşt Şəfinin “Başqa adamlar” kitabı diqqətəlayiq kitabdır. Mən Zərdüştün ədəbi istedadına şübhə etmirəm, əminəm ki, onun bu kitabda toplanmış hekayələrini oxuyanlar bəyənəcəklər və Azərbaycanın yaradıcı gəncliyinin gələcəyinə inamla yanaşacaqlar”. Çıxışının sonunda Rəşad Məcid “Təhsil” nəşriyyatının rəhbəri Bəhruz Axundova və onun irəli sürdüyü bu yeni təklifi dəstəklədikləri üçün Azərbaycan Yazıçılar Birliyinin sədri, xalq yazıçısı Anara, qurumun katibliyinə öz təşəkkürünü bildirib.

Sonra söz kitabın redaktoru Mustafa Çəmənliyə verilib: “Zərdüştün bəzi hekayələri məni müsbət mənada çox təəccübləndirdi. Xüsusilə də onun “Qarışqa-adam” hekayəsinin məni heyrətləndirdiyini gizlətmirəm”. Bəhruz Axundovun bu təşəbbüsünü və bu yöndə fəaliyyətini alqışladığını, gənclərə qayğını ürəkdən dəstəklədiyini bildirən M.Çəmənli Z.Şəfini təbrik edib, gənc yazıçıya yeni uğurlar arzulayıb.

Professor Cahangir Məmmədli öz çıxışında bədii əsərin ilk cümləsindən gələn təəssüratın onu heç vaxt aldatmadığını, Z.Şəfinin yaradıcılığı ilə bağlı da belə bir müsbət qənaətdə olduğunu vurğulayıb. Zərdüşt Şəfinin bir müddət əvvəl “525-ci qəzet” də dərc edilən “Sonuncu çiçək dükanı” hekayəsinin onu dərindən təsirləndirdiyini qeyd edən professor bu barədə deyib: “Bədii əsərin, xüsusilə də nəsrin mənim üçün yazıldığını ilk sətirlərdən müəyyən edirəm. Əgər ilk sətirlər məni əsəri oxumağa çağırırsa, bu əsər mənimdi, yox çağırmırsa, mən o əsərdən sonra bir sətir də oxumuram. Zərdüştün “Sonuncu çiçək dükanı” hekayəsinin ilk sətirlərini oxuyanda gördüm ki, o, yazıçıdır. Mən Zərdüştə təşəkkür edirəm ki, o bu cür sanballı, dəyərli əsərlər qələm alır”.

Yazıçı İlqar Fəhminin fikrincə, Zərdüşt Şəfizadə yaradıcılığa ciddi və səbrlə yanaşan, istedadlı qələm sahibidir: “Mən əminəm ki, o doğru yolda addımlayır. Mən Anar müəllimə, Fikrət müəllimə, Rəşad müəllimə və digər dəyərli söz sahiblərinə də öz minnətdarlığımı bildirirəm ki, gənc yazarlardan öz qayğı və diqqətlərini əsirgəmirlər”.

Daha sonra “525-ci qəzet”in redaktor müavini Seyfəddin Hüseynli çıxış edib: “Hər zaman müəlliflə redaktor, naşir arasında qəribə bir münasibət olur. İlk vaxtlar, adətən, müəllif çalışır ki, öz yazısı haqqında redaktordan, naşirdən müsbət rəy alsın. Müəyyən mərhələdən sonra isə redaktor istedadı, yaradıcılığı ilə fərqlənən hansısa müəllif haqqında vaxtilə dediyi müsbət fikrə görə məmnunluq hissi keçirir. Həmin müsbət rəyə başqalarının da şərik olması redaktoru sevindirir. Zərdüşt mənim nəzərimdə məhz belə müəlliflərdən biridir, çünki indi baxıb görürəm ki, onun yazıları barədə müsbət qənaətimi bölüşənlər az deyil. Üstəlik, həmin adamlar məndən xeyli təcrübəli, nüfuzlu və daha yüksək ədəbi zövqə malik insanlardır. Bu ilk kitabı məndə belə bir təəssürat yaratdı ki, Zərdüştü bütün nəsildən olan ədəbiyyatsevərlər həvəslə oxuyacaqlar, onun istedadı, seçdiyi mövzular və yaradıcılıq qabiliyyəti bunu deməyə əsas verir”.

AYB-nin katibi, ədəbiyyatşünas Arif Əmrahoğlu Zərdüştün dəyişdirilməsi mümkün olmayan başqa insanlar haqqında yazdığını və yaradıcılığını bunun üzərində qurduğunu, ciddi uğur qazandığını önə çəkib. A.Əmrahoğlu müəllifin bir neçə hekayəsini ətraflı təhlil edib və onun mülahizələri böyük maraqla qarşılanıb.

Xalq şairi, AYB-nin birinci katibi Fikrət Qoca da öz növbəsində gənc yazarı təbrik edib, Gənc Ədiblər Məktəbinin yaranmasında və bu cür istedadlı gənclərin ədəbi mühitə gətirilməsində göstərdiyi xidmətə görə Rəşad Məcidə təşəkkürünü bildirib: “İstedadlı insanlar harda olsa, nə zaman olsa, çiçək kimi açılıb üzə çıxacaq. Amma onlara kömək etmək lazımdır. Zərdüşt Şəfi də belə gənclərdəndir. Rəşad Məcidə ona görə böyük təşəkkür düşür ki, belə gəncləri vaxtında üzə çıxarır və onlara köməklik göstərir”.

Çıxış üçün söz verilən Zərdüşt Şəfi kitabının nəşrinin həyata keçməsində, bu tədbirin təşkilində zəhməti olanlara və mərasimə qatılanlara minnətdarlıq edib: “Burada qələminə hörmət bəslədiyim şəxslər mənim ünvanıma çox gözəl sözlər söylədilər. Mən onların hər birinə dərin minnətdarlığımı bildirirəm. Əvvəllər mən bir evdə idim – öz evimizdə. Bu kitab vasitəsilə mən yüz, bəlkə də daha çox evdə qonaq olacam. Bunun üçün çox şadam. Bu kitabın ərsəyə gəlməsində əməyi olan hər kəsə, xüsusən “Təhsil” nəşriyyatının rəhbəri Bəhruz Axundova, redaktorum, hörmətli yazıçımız Mustafa Çəmənliyə, Rəşad müəllimə ürəkdən təşəkkürümü bildirirəm”.

Tədbirin sonunda xalq yazıçısı Anar çıxış edərək Zərdüşt Şəfini təbrik edib: “İnanıram ki, onun bundan sonra çox kitabı işıq üzü görəcək. Ancaq ilk kitabın sevinci təkrar olunmayacaq. Mən bunu öz təcrübəmə əsaslanıb deyirəm. Mənim ilk kitabım əlli il bundan öncə çıxmışdı, həcmi də bu kitabın həcmindən 3-4 dəfə kiçik idi. İndi baxıram, bu kitab olduqca sanballı bir nəşrdir. Buna görə də Bəhruz Axundova çox sağ ol deyirəm. Mən Zərdüştün iki hekayəsini oxudum və bu mənə kifayət etdi ki, onun istedadlı bir yazıçı olduğu qənaətinə gəlim”.

GÜNEL

525-ci qəzet.- 2011.- 24 noyabr.- S.7.