Söz ürəkdən
gələndə...
Xuraman İsmayılova yeni çapdan çıxmış “Ürəyimdən keçənlər” kitabını mənə xeyli müddət idi ki, bağışlamışdı. Amma işlərim çox olduğundan onu oxumağa və müəyyən qeydlər aparmağa vaxt tapa bilmirdim. Ara-sıra kitabı əlimə alıb vərəqləyir, povest və hekayələrin, mənsur şeirlərin adlarına baxırdım. Yeri gəlmişkən deyim ki, ilk diqqətimi çəkən kitabın adı oldu. Adətən yaradıcı insanların ürəyindən çox şeylər – böyük-böyük romanlar, povestlər, hekayələr, daha nə bilim nələr-nələr yazmaq keçir. Bütün ömrü boyu əlləşib-vuruşur, çalışır ki, istəklərinə çatsın. Ömürdən yel qanadlı illər ötüb keçir, amma o heç də həmişə ürəyindən keçənləri yaza bilmir. Əgər Xuraman xanım bu kitabında ürəyindən keçənlərin hamısını yaza bilibsə, ağ vərəqlər üzərinə köçürə bilibsə, xoşbəxtdir.
Xuraman İsmayılovanın bir neçə
kitabını oxumuşam. Mən onu bir şair kimi tanıyıram. Şeirləri
də Qarabağ ağrılı, yurd nisgilli, dərdli qəmlidir.
Qəhrəmanlıq və vətənpərvərlik, torpaq
nisgili, yurd həsrəti mövzuları onun yaradıcılığından
qırmızı xətlə keçir. Amma ara-sıra nəsrə
də üz tutur. Çox maraqlı və oxunaqlı povest və
hekayələr yazır. “Ürəyimdən keçənlər”
kitabında da X.İsmayılovanın povest, hekayə və mənsur
şeirləri toplanıb. “Nərgiz” nəşriyyatında
çapdan çıxmış kitaba filologiya elmləri namizədi
Esmira Fuad ön söz yazaraq Xuraman İsmayılovanın
yaradıcılığı haqqında oxuculara kifayət qədər
geniş məlumat verib.
Kitab
oxucuların üzünə “Taleyin acı qisməti” povesti ilə
açılır. Adından da göründüyü kimi bu
povest həyatda bütün çətinlikləri
görmüş bir insanın taleyinə həsr olunub. Bu insan
Lamiyə adlı gözəl bir qızdır. Müəllif
Lamiyənin timsalında Azərbaycan qadınının mərd
və mübariz obrazını yaradıb. Həyatın
ağrı-acılarına sinə gərən Lamiyə tibb
bacısı kimi cəbhə bölgəsinə, hospitala
yollananda atası Rüstəm kişi onu yoldan saxlamaq istəyir.
Amma o, tutduğu yoldan dönməyərək yaşlı
atasına bu sözləri deyir:
– Əgər
bir ailədə oğlan – kişi yoxdursa, onda ailənin
qızı Vətən uğrunda vuruşmalıdır,
övladlıq borcunu yerinə yetirməlidir. Mən bu yoldan
necə dönüm, ata? Oğullarımız həlak olur,
torpaqlarımız əlimizdən gedir, necə oturum evdə,
necə?..
Atası
qızını bağrına basıb ağlayır. Kişi
qeyrətli Lamiyə isə tibb bacısı kimi cəbhə
bölgəsinə yollanır.
“Şəhidlər
xiyabanı” mənsur şeirində bu misraları oxuyuruq: “...
Soyuq məzar daşlarını yanan sinəsinə sıxan,
qara yaylıqlı, qara bəxtli gəlinlərin ürək
dağlayan, qəlb yandıran baxışlarından od tutub
yanmadınmı? Bütün dərdlərdən ağır
sənin dərdindir, bütün ağrılardan acı sənin
ağrındır, Şəhidlər xiyabanı! Ən
böyük şəhid, elə sən özünsən,
Şəhidlər xiyabanı!”
“Laçınım”
mənsur şeiri də neçə illərdən bəri
düşmən işğalı altında qalan
Laçın rayonuna həsr olunub.
İnanıram ki, Xuraman xanımın yazdığı “Ürəyimdən keçənlər” kitabı oxucuların ürəyincə olacaq. Povest və hekayələrdə təsvirini tapan hadisələr oxuyanları həmişə mübariz, mərd və qəhrəman olmağa ruhlandıracaq. Çünki “Ürəyimdən keçənlər” mübarizə ruhu aşılayan bir kitabdır.
Vahid MƏHƏRRƏMOV
525-ci qəzet.- 2011.- 4 oktyabr.- S.7.