“Maestro özü və zaman haqqında” nümayiş etdirilib

Səməd Vurğun adına Rus Dram Teatrında “Maestro. Özü və zaman haqqında” sənədli filminin təqdimat mərasimi gerçəkləşib. Film tanınmış bəstəkar, xalq artisti Xəyyam Mirzəzadənin yaradıcılığına həsr edilib. Mədəniyyət və turizm naziri Əbülfəs Qarayev mərasimi giriş sözü ilə açaraq ölkənin müasir musiqi mədəniyyəti tarixində Xəyyam Mirzəzadənin böyük xidmətlərini diqqətə çatdırıb: “Son illər Mədəniyyət və Turizm Nazirliyinin sifarişi ilə mədəniyyət xadimləri haqqında silsilə sənədli filmlər çəkilir. Təqidmatı keçirilən “Maestro. Özü və dövrü haqqında” filminin ən tələbkar tamaşaçısı filmin qəhrəmanının özüdür. O, ekrandan tamaşaçı ilə özü və yaradıcılığı, müəllimləri, dostları, şagirdləri haqqında təəssüratlarını bölüşür”. Xəyyam Mirzəzadə yüksək mükafata görə ölkə rəhbərliyinə təşəkkürünü bildirib: “Son illər əsərlərimin ikicildliyi, 6 diskdən ibarət məcmuə buraxılıb. İndi də “Şərəf” ordeni ilə təltif olundum. Belə şərəf hər adama nəsib olmur. Ümummilli lider Heydər Əliyevin mənə “Şöhrət” ordenini necə təqdim etdiyi yadımdadır. İkinci ordeni isə ölkə Prezidenti İlham Əliyevdən qəbul etdim. Bütün bunlara görə dövlətə və xalqımıza minnətdaram. Bu diqqət, yaradıcılığıma göstərilən qayğı gələcək uğurlara stimul verir”. Filmin nümayişindən əvvəl yaradıcı kollektivlə görüş keçirilib. Qeyd edək ki, film “Cinealliance” studiyası ilə birlikdə “Salnamə” kinostudiyasında çəkilib. Ssenari müəllifi və rejissor Tofiq İsmayılov, operator Ziya Babayev, musiqi redaktoru Rauf Əliyevdir.

HÜSNİYYƏ

525-ci qəzet.- 2011.- 6 oktyabr.- S.7.