“Müəllimlərin mükafatlandırılması Azərbaycan təhsilinə verilən yüksək qiymətdir”

MİSİR MƏRDANOV: “SON İLLƏR AZƏRBAYCANDA DÖVLƏTLƏ BİRLİKDƏ İCTİMAİYYƏTİN DƏ TƏHSİLƏ MÜNASİBƏTİ MÜSBƏTƏ DOĞRU XEYLİ DƏYİŞİB”

Dünən Təhsil Nazirliyində Müəllimlər Gününə həsr olunan tədbir keçirilib. Tədbirdə təhsil naziri Misir Mərdanov, Həmkarlar İttifaqları Konfederasiyasının rəhbəri, millət vəkili Səttar Mehbalıyev, Bakı Şəhəri üzrə Təhsil İdarəsinin müdiri Nailə Rzaquliyeva və ölkə prezidentinin son fərmanı ilə təltif olunan müəllimlər iştirak ediblər. Tədbirdə çıxış edən təhsil naziri Misir Mərdanov bildirib ki, son illər bu gün Azərbaycanda milli bayram səviyyəsində qeyd olunur. Bu bayrama münasibətin ildən-ilə yaxşılaşdığını və kütləviləşdiyini bildirən nazir buna nümunə kimi ölkə prezidentinin son fərmanı ilə 128 müəllimin müxtəlif səviyyələrdə təltif olunmasını göstərib: “Bu müəllimlərin mükafatlandırılması bütün Azərbaycan müəllimlərinə, Azərbaycan təhsilinə verilən yüksək qiymətdir”. Nazir son illər təhsilin bütün pillələrində yeniliklərin həyata keçirildiyini, şəraitin daha da yaxşılaşdırıldığını bildirib: “Buna baxmayaraq, biz arxayın olmamalıyıq. Qarşıda bizi daha çətin işlər gözləyir”.

`M.Mərdanov vurğulayıb ki, təhsilin rolu və əhəmiyyəti qloballaşmanın getdikcə vüsət aldığı, insan resurslarının, elm və texnologiyanın iqtisadi inkişafda həlledici amilə çevrildiyi, təbii resursların durmadan azaldığı çağdaş dünyamızda daha da artmaqdadır. Məhz buna görədir ki, Birləşmiş Millətlər Təşkilatı XXI yüzilliyi “Təhsil əsri” elan edib: “Qətiyyətlə demək olar ki, yüksək intellektə malik insan kapitalının formalaşmasında, davamlı inkişafa zəmin yaradan güclü iqtisadiyyatın qurulmasında təhsilin rolu heç vaxt indiki kimi aktual olmayıb. Təhsili cəmiyyətin fəal hərəkətverici, inkişafetdirici qüvvəsinə çevirənlər isə məhz müəllimlərdir. Təhsilin məzmunu nə qədər yüksək və mükəmməl, maddi-texniki bazası nə qədər möhkəm, biliklərin ötürülməsi vasitələri nə qədər təkmil və müasir olsa da, əgər müəllim yoxdursa, heç nədir. Təhsil məhz müəllim əqlinin gücü ilə cəmiyyətin inkişaf amilinə çevrilir, biliklərin, mədəniyyətlərin, milli adət-ənənələrin daşıyıcısı olan yeni-yeni nəsillər məhz müəllim zəkasının nurundan, müəllim qəlbinin hərarətindən pay alaraq formalaşır. Bu baxımdan müəllim təhsildə əsas sima, aparıcı qüvvədir. Buna görə də müəllimlik bütün dövrlərdə və ölkələrdə ən şərəfli peşə hesab olunub, bu adı daşıyanlara həmişə böyük hörmət və ehtiram göstərilib. Hətta ən böyük dahilər belə öz uğurlarına görə öncə müəllimlərinə borclu olduqlarını bildiriblər”.M.Mərdanov təhsil sahəsində bir sıra problemlərin mövcud olduğunu da qeyd edib: “Dünyanın elə bir ölkəsi yoxdur ki, təhsil sahəsində problemlər olmasın. Və həmçinin elə bir ölkə yoxdur ki, orada təhsil sahəsindəki bütün problemlər dövlət hesabına həll olunsun. Valideynlərin məktəblərə yardım etməsi təbiidir. Valideynlər görsələr ki, onların qanuni yolla etdikləri yardım övladlarının təhsilinin keyfiyyətinə müsbət təsir göstərir, bu, heç bir problem yaratmaz. Amma təəssüf ki, hələ də bizim ümumi işimizə xələl gətirən müəllimlər var”. Nazir müəllimlərin ixtisasının artırılması və təkmilləşdirilməsi sahəsində də bəzi problemlərin olduğunu dilə gətirib. M.Mərdanovun sözlərinə görə, son illər Azərbaycanda dövlətlə birlikdə ictimaiyyətin də təhsilə münasibəti müsbətə doğru xeyli dəyişib. İndi ən müxtəlif peşə adamları da Təhsil Nazirliyinə, məktəblərə teleqram göndərərək onları təbrik edirlər. Bu, o deməkdir ki, ölkədə müəllimə və təhsilə diqqət artıb və bu bizi daha məsuliyyətli işləməyə sövq edir: “Bu il müəllim günü ilə əlaqədar təhsil işçilərinə əsas təbrik cənab prezidentdən gəlib. Belə ki, ölkə başçısının fərmanı ilə Azərbaycanın seçilmiş müəllimlərinə Əməkdar müəllim fəxri adı, bir çox təhsil işçisinə “Tərəqqi” medalı verilib. Bu ənənə hər il oktyabrda təkrar olunur”. Nazir qeyd edib ki, əsas müəllimin ali və ya orta təhsilli olmasında yox, onun təhsil sahəsindəki proseslərdən yeniliklərdən məlumatlı olmasındadır: “Ən vacibi odur ki, müəllim ziyalı olmalıdır. Gərək o müasir təhsil tendensiyalarından, bu sahədə həyata keçirilən hadisələrdən vaxtında və yetərli xəbərdar olsun. İndi Azərbaycanda müəllimlərin böyük əksəriyyəti bu meyarlara cavab verir. Güman edirəm ki, bu şəkildə davam edərsə, yaxın gələcəkdə ölkədə bütün müəllimlər həm savad və qabiliyyətinə görə, həm də ümumilikdə bir ziyalı olaraq cəmiyyətin etimadını doğruldacaq”. Nazirin dediyinə görə, Azərbaycan müstəqilliyini əldə etdikdən sonra, digər sahələrlə yanaşı, təhsil sahəsi də sürətlə inkişaf etməyə başlayıb. Bu sahənin inkişafına xidmət edən proqramlar qəbul edilib, müəllim hazırlığının təkmilləşdirilməsi istiqamətində müəyyən işlər görülüb. Paytaxtda və bölgələrdə bir-birinin ardınca məktəblər, əlavə korpuslar tikilib, bəzi müəssisələrdə təmir-bərpa işləri aparılıb: “Hər il dövlət büdcəsindən təhsil sahəsinə ayrılan vəsaitin məbləği artırılır. Müəllimlərin əmək haqları yüksəldilir. Azərbaycanda təhsilə qayğının təməli ümummilli lider Heydər Əliyev tərəfindən qoyulub. O, ölkənin uğurlu gələcəyini təhsildə, müasir standartlara uyğun səviyyədə təhsil alan gənclərdə görürdü. Heydər Əliyev hakimiyyətdə olduğu illərdə daim təhsil sahəsini xüsusi diqqət yetirib. Onun təməlini qoyduğu ənənə bu gün də uğurla davam etdirilir. Hər il olduğu kimi bu il də təhsilə ayrılan məbləğin miqdarını artırılıb. Bu da dövlətin, prezidentin bu sahəni, təhsil işçilərini daim diqqətdə saxladığını göstərir. Təhsil işçiləri də bunu nəzərə alaraq vəzifələrinə daha məsuliyyətlə yanaşmalı, onlara göstərilən bu etimadı doğrultmalıdırlar”.Qeyd edək ki, təhsil naziri Misir Mərdanov başda olmaqla nazirliyin kollektivi 5 oktyabr – Beynəlxalq Müəllimlər Günü münasibətilə Fəxri Xiyabanda ümummilli lider Heydər Əliyevin məzarını və Şəhidlər Xiyabanını ziyarət ediblər.

Sevinc QARAYEVA

525-ci qəzet.- 2011.- 6 oktyabr.- S.2.