İlyas Əfəndiyevin virtual muzeyinin təqdimatı olub

Azərbaycan Dövlət Akademik Milli Dram Teatrında xalq yazıçısı İlyas Əfəndiyevin virtual muzeyinin təqdimatı mərasimi gerçəkləşib. İ.Əfəndiyevin həyat və yaradıcılığının əks olunduğu virtual muzey Mədəniyyət və Turizm Nazirliyinin təşəbbüsü və dəstəyi ilə “Musiqi dünyası” jurnalının elmi nəşrlər mərkəzinin mütəxəssisləri tərəfindən hazırlanıb.

Tədbiri giriş sözü ilə teatrın direktoru İsrafil İsrafilov açaraq İ.Əfəndiyevin Azərbaycan ədəbiyyatı və dramaturgiyasındakı yeri haqqında fikirlərini dilə gətirib: “İlyas Əfəndiyev Azərbaycan ictimai fikrinin formalaşmasında, mədəni və mənəvi həyatımızda müstəsna yerə malik olub. Azərbaycan ədəbiyyatı, teatrının inkişafı bir sıra mötəbər şəxsiyyətlərlə yanaşı, İlyas Əfəndiyevin adı ilə sıx bağlıdır. Tədbirin bu məkanda keçirilməsi heç də təsadüfi deyil. Çünki Akademik Milli Dram Teatrı İlyas Əfəndiyevin ikinci evi sayılır”.

Sənətşünaslıq doktoru, professor Məryəm Əlizadə İ.Əfəndiyevin ədəbiyyata gəlişi, bu sahəyə bəxş etdiyi yaddaqalan əsərləri haqqında danışıb: “Ədəbiyyata 1939-cu ildə “Kənddən məktublar” adlı hekayələr kitabı ilə gələn ədib söz sənətinin, demək olar ki, bütün janrlarında qələmini sınayaraq, məqalə, oçerk, hekayə, povest, roman, ssenari, pyeslər yazıb. Beləliklə də XX əsr Azərbaycan ədəbiyyatının ən görkəmli nümayəndələrindən biri kimi təkcə ölkəmizdə deyil, onun hüdudlarından kənarda da tanınıb. İlyas Əfəndiyev dramaturgiyamızın tarixində ən şərəfli yerlərdən birini tutur. O, milli ədəbiyyatın, estetik fikrin inkişafında əvəzsiz xidmətləri olan istedadlı dramaturq kimi məşhurlaşıb. İlyas Əfəndiyev XX əsr dramaturgiyamızda yeni lirik-psixoloji üslubun əsasını qoyaraq, aktyor və rejissorların yetişməsinə şərait yaradıb. Akademik Milli Dram Teatrında yazıçının demək olar ki, bütün pyesləri səhnələşdirilib. Teatrda müasirlik, bədii-estetik kateqoriya anlayışları da bilavasitə onun adı ilə bağlıdır. Aktyora, onun səhnədəki yaşantılarına böyük önəm verən dramaturq, aktyorları çox sevirdi.

Azərbaycan Dövlət Gənc Tamaşaçılar teatrının baş rejissoru, xalq artisti Cənnət Səlimova ədibin “Məhv olmuş gündəliklər” pyesinin ilk dəfə səhnəyə qoyulduğu illəri yada salaraq, uzun illərdən sonra Gənc Tamaşaçılar Teatrında tam yeni üslubda səhnələşdirilən əsəri müqayisə edib. C.Səlimovanın sözlərinə görə, xalq artisti Vaqif Əsədovun təqdimatında yeni üslubda, maraqlı tərtibatda, teatrın gənc aktyorlarının ifasında hazırlanan tamaşanın uğurlu alınmasının əsas səbəblərindən biri yazarın əsərinin bütün dövrlər üçün aktual problemləri əks etdirməsidir.

“Musiqi dünyası” jurnalının baş redaktoru Taryel Məmmədov çıxışında təqdimatı həyata keçirilən virtual muzey haqqında ətraflı məlumat verib: “30 saat video, 18 saat audio materialların yer aldığı virtual muzeydə İlyas Əfəndiyevin müsahibələri, çıxışları, xatirələri, nəşr edilən əsərləri və məqalələri toplanıb. Hazırda yalnız Azərbaycan dilində fəaliyyət göstərəcək virtual muzeyin daha sonra ingilis dilində versiyası da hazırlanacaq. İstifadəçilər ilyasafandiyev.musigi-dunya.az saytına daxil olmaqla bu virtual muzeylə yaxından tanış ola biləcəklər”.

Təqdimat mərasimində çıxış edən Baş nazirin müavini, xalq yazıçısı Elçin Əfəndiyev təqdimatın İ.Əfəndiyevin ruhən bağlı olduğu Milli Dram Teatrında keçirilməsini xüsusilə sevindirici olduğunu bildirib. Elçin atasının xatirəsinə göstərilən böyük hörmət və ehtirama görə tədbirin təşkilatçılarına və iştirakçılarına minnətdarlığını bildirib. Sonda xalq artisti Aygün Bayramova, caz ifaçıları Şahin Növrəsli, İsfar Sarabski, pianoçu Murad Hüseynovun çıxışları dinlənilib.

HÜSNİYYƏ

525-ci qəzet.- 2011.- 8 oktyabr.- S.21.