Abbas Zamanov Mədəniyyət və İncəsənət Universitetində yad edildi

Bu günlər ölkə başçısı İlham Əliyevin sənəncamı ilə anadan olmasının 100 illiyi qeyd edilən əməkdar elm xadimi, AMEA-nın müxbir üzvü, professor Abbas Zamanov onu tanıyanların xatirəsində mərd, mübariz, sözü üzə deyən insan, görkəmli mətnşünas, ədəbiyyatşünas alim kimi anılmaqdadır.

Bəlkə də Abbas Zamanov ən azı çox gənc ikən sovet repressiya maşınının qurbanı olmuş Mikayıl Müşfiqin yaşıdı olsaydı və hardasa ötən əsrin 50-ci illərindən sonrakı elmi, pedaqoji fəaliyyətini, cəsarətli şəxsiyyət kimi gəlişmələrini 30-cu illərdə sərgiləsəydi yəqin ki, onu da Müşfiqin taleyi gözləyərdi. Hərçənd ki, hətta SSRİ-nin rəhbərlərindən olmuş Xuruşşov zamanında belə səngiməyən, məxsusi çalarlarıyla özünü büruzə verən repressiya üsulları Abbas Zamanovdan yan keçmədi və o da sələfləri kimi sovetin mənfur xislətlərindən az “yarınmadı”, amma yaşadı, sözünü axıracan dedi, sınmadı, əyilmədi. Odur ki, hələ də müsbət aurasının işığını həyatımızda daim hiss etdiyimiz bu bəstə boylu, qaş-qabaqlı olsa da daxilən tükənməz nurlu insanın 100 illik yubileyini hər birimiz doğmamızın, əzizimizin bayramı, şüləni kimi qarşılayırıq . Onun çalışdığı, rəhbərlik etdiyi, pedaqoji fəaliyyətdə bulunduğu idarələrdə, elm, təhsil ocaqlarında bu günlər xüsusi bir canlanma nəzərə çarpır, Abbas müəllimin şərəfinə müxtəlif formatlı tədbirlər bir-birini əvəz edir. Onun zaman-zaman çiyin-çiyinə çalışdığı, dərs dediyi, elmi rəhbəri olduğu insanlar çoxdan çoxdur. Və onların böyük bir dəstəsi də bu gün Azərbaycan Dövlət Mədəniyyət və İncəsənət Universitetində elmi, pedaqoji fəaliyyətlə məşğuldur. Universitetin Elmi şura zalında baş tutan konfransa toplaşan bu insanların üzlərindəki məmnunluq ifadəsi dərhal gözə çarpırdı. Bu, əlbəttə Abbas Zamanovun xatirəsinin unudulmazlığına işarə idi.

Konfransı giriş sözüylə açan universitetin rektoru, professor Timuçin Əfəndiyev unikal bir şəxsiyyət, istedadlı alim kimi A.Zamanovun bənzərsizliyindən, onun elmi fəaliyyətindən, dəyərli monoqrafiyalarından söhbət açdı, onunla bağlı həyatda rast gəldiyi maraqlı məqamlara toxundu, şəxsi xatirələrini dinləyicilərlə bölüşdü.

Sonra söz universitetinin “Sənətşünaslıq” fakültəsinin kafedra müdiri, filologiya elmləri doktoru, professor Gülşən Əliyevaya verildi. Öz məruzəsini daha çox şəxsi müşahidələri, son dərəcə səmimi, bir qədər də emosional tonda quran alimin çıxışı konfrans iştirakçıları tərəfindən böyük diqqət, maraq və rəğbətlə qarşılandı. Burda Gülşən xanımın həm də publisist, yazıçı kimi də səriştəsi özünü göstərdi.

Görkəmli alim, filologiya elmləri doktoru Qəzənfər Paşayevin Abbas Zamanov haqqında söylədiklərindən bu çağacan alim haqqında bilmədiyimiz bir sıra faktların şahidi olduq.

Professorlar Nizaməddin Şəmsizadə ilə Kamran Əliyev bir vaxtlar dərs aldıqları, müdrik məsləhətlərini dinlədikləri müəllimləri barədə xatirələrini söyləməklə dinləyici auditoriyasına xüsusi bir canlanma gətirdilər.

Sonda Abbas Zamanovun yadigarları-oğlu Fuad Zamanov və qız nəvəsi Gülgün Rzayeva valideynlərini bu sayaq möhtəşəm bir törənlə yad etdiyinə, onlara son dərəcə duyğulu anlar onlar bağışladığına görə ADMİU-nun rəhbərliyinə, professor –müəllim heyətinə təşəkkürlərini bildirdilər.

İntiqam

525-ci qəzet.- 2011.- 12 oktyabr.- S.7.