Ramil Qasımov “Mən fəxr edirəm ki, azərbaycanlıyam” adlı solo-proqramla çıxış edib

İstedadlı vokalçı Ramil Qasımov Azərbaycan Respublikasının dövlət müstəqilliyinin bərpasının 20-ci ildönümü münasibəti ilə Zərdab şəhərində “Mən fəxr edirəm ki, azərbaycanlıyam” adlı solo- konsert verib. Konsertlə bağlı təəssüratlarını bölüşən Ramil Qasımov deyib: “Həsən bəy Zərdabinin yurdu olan Zərdabda konsertim gözlədiyimdən də yüksək səviyyədə baş tutdu. Oradakı insanlarda gördüyüm mədəniyyət, klassik musiqiyə olan maraq məni valeh etdi. Doğrusu tərəddüd edirdim ki, bu insanlar qarşısında iki saatlıq klassik musiqi necə təsir bağışlayacaq. Nəzərə alsaq ki, bu gün daha çox estrada musiqiləri əhali arasında yayılıb, fikirləşirdim, görəsən 3-4 mahnıdan sonra yorulmazlar ki? Gördüm, çox yanılmışam. Həqiqətən də hər şey mükəmməl idi. Meydanda qurulmuş böyük səhnədə 54 min əhalisi olan zərdablıların alqışlarını eşitmək, üzlərindəki sevinci görəndə xoşbəxt oldum. Həqiqətən də onlar Azərbaycan klassik musiqisini dəyərləndirməyi bacarırlar. İfam zamanı gül dəstələri üstümə yağırdı. Fikrimcə, bundan böyük sevinc ola bilməz”.

R.Qasımovun sözlərinə görə, bu konsertin keçirilməsində digər məqsədlərdən biri Azərbaycan milli klassik musiqi əsərlərinin təbliği olub. Konsertdə Ramil Qasımovla birgə onun tələbəsi İlkin Əhmədov, sənətçi Oqtay Hacıyev və xüsusi rəqs qrupu çıxış edib. İki saatlıq konsert Ramil Qasımovun ifasında ümummilli lider Heydər Əliyevə həsr olunmuş “Məşəl kimi yanan ürək” mahnısı ilə yekunlaşıb.

Vokalçıya Zərdab rayon icra hakimiyyəti tərəfindən fəxri fərman verilib: “Bu da mənim üçün sevincli, yaddaqalan bir hadisə oldu. Şübhəsiz ki, istər regionlarda, istərsə də ölkə xaricində çıxışlar etmək bizim borcumuzdur. Bu şərəfli bir işdir və bu sırada adımın olmasından məmnunam”.

Konsert çərçivəsində R.Qasımov Zərdab haqqında oxuduğu mahnıya çəkilən klipi də zərdablılara təqdim edib. Ötən gün isə Zərdabda bu klipin təntənəli təqdimat mərasimi keçirilib.

HÜSNİYYƏ

525-ci qəzet.- 2011.- 14 oktyabr.- S.7.