Bakıda caz festivalına start verildi

Heydər Əliyev Sarayında Mədəniyyət və Turizm Nazirliyi, Azərbaycan Mədəniyyət Fondu və “Sweet production” şirkətinin təşkilatçılığı ilə “Bakı Beynəlxalq Caz Festivalı – 2011”in açılış mərasimi keçirilib. APA-nın məlumatına görə, təntənəli açılışla bağlı sarayın foyesində festivalda çıxış edən caz kollektivlərinin fotoşəkillərindən ibarət sərgi təşkil edilib. Açılış mərasiminin aparıcılığını həyata keçirən bildirib ki, oktyabrın 29-dək davam edəcək festival çərçivəsində paytaxtımızın bir çox mədəniyyət ocaqlarında dünyanın tanınmış caz ifaçıları geniş konsert proqramları ilə çıxış edəcəklər. Mərasimdə son illər Azərbaycanda caz musiqisinin təbliği, inkişafı baxımından çox işlər görüldüyü vurğulanıb. Eləcə də dünyanın ən tanınmış cazmenlərinin Bakıda konsert proqramları ilə çıxış etdikləri xatırlanıb. Gecədə tanınmış caz ifaçısı xanım Reyçel Ferrel çıxış edib və onun Bakı səhnəsində ifası tamaşaçıların alqışları ilə müşayiət olunub. 1961-ci ildə ABŞ-da anadan olan R.Ferrelin indiyədək 6 albomu işıq üzü görüb. Qeyd edək ki, oktyabrın 29-dək davam edəcək festival çərçivəsində Heydər Əliyev Sarayı ilə yanaşı, Beynəlxalq Muğam Mərkəzi, Azərbaycan Dövlət Filarmoniyası və Bakı Caz Mərkəzində konsertlər keçiriləcək. Marsio Faraco, Rudreş Mahantappa, “Aleksandr Maşin və dostları” caz qrupu, De Phazz, Misirli Əhməd, “Yeni adlar” caz layihəsi, Elçin Şirinov, Şahin Növrəsli, Ben Vestbeech, Salman Qəmbərov və Yuri Kuznetsov, Cəmil Əmirov və “Savab” qrupu, İsfar Sarabski, Əfqan Rəsul, Rain Sultanov, Vaqif Sadıxov, Sonny Emory “Cachet Fusion”, Jazzanova kimi musiqiçi və musiqi kollektivlərinin konsertlərinin keçirilməsi planlaşdırılır. Festivalın bağlanış mərasimi oktyabrın 29-da olacaq. Festival çərçivəsində Rafiq Babayevin 75 illik yubileyi münasibətilə xatirə gecəsi də keçiriləcək.

525-ci qəzet.- 2011.- 18 oktyabr.- S.7.